Friday, August 22, 2025

PATHIANIN NANGMAHA A THIL HMUH

_I Khawthlir Dan Thlak_

By Rick Warren
— August 22, 2025
“Kan za hian beram angin kan vak bo va; mahni kawng kawngah kan peng ṭheuh va; Lalpa chuan ani chungah chuan kan zaa khawlohna chu a nghat a ni.” [Isaia 53:6]

Khawvel pumpuiah thinlung natna a hluar hle mai a – tisa thinlung natna ringawt ni lovin. Thinlung natna nena inkungkaih – mahni inthiamlohna, thil chin dawklak leh lungngaihnate chu a hluar hle a ni. 

Kraws lera Isua a thih khan i buaina khirh ber berte chu a chingfel a, thinlung natnain a kaihhnawih zawng zawngte nen pawh chuan. Chutianga a tih dan pawimawh tak chu aiawh hmangin a ni. 

“Aiawh” tih awmzia chu Isua chu i awmna turah lo awmin i sual avanga hremna i chan tur chu a lo hmachhawn ta a ni. Mi famkim lo [nangmah] tan hmun famkim [vanram] thleng a, sual haw em em tu Pathian famkim awmna thlen theih dan kawng dang pakhat mah a awm lo. Krawsah chuan Isua chu i aiawhtu chu a ni. 

Rom 3: 25 chuan, “Pathian dawhtheihnaa hmanlai sualte hai dera a awm avang khan, Pathianin amah felzia entir nan Krista Isua chu, a thisena, rinna avanga sual thupha chawinaah a ruat a,” tiin a sawi. 

Tumah famkim an awm lo. Kan hre vek! Keimah duhthusam pawh kan tling zo lo a nia, Pathian duh dan phei chu pha lo tak kan ni. Pathian dan i bawhchhiat chang chuan, mihring danin a siam hremna eng emaw i hmachhawn ṭhin. Lamlianah chak taka lirthei i khalh a nih chuan police ten an lo tiding che ang a, pawisa an chawitir ang che. Tu emaw ina i lut ru a nih chuan tan inah hun eng emaw chhung chu i luh ngei a ngai ang. 

Pathian dan i bawhchhiat chuan Pathian hremna i hmu ang. Pathian chuan, “Sual man chu thihna a ni si a,” tiin a sawi. [Rom 6: 23] 

Mahse thu lawmawm em em chu hei hi a ni Isuan i sual man bat a tlaksak tawh che. I thil lo tihsual leh tihsual leh tur zawng zawngte chu a man a pe tlak tawh e. 

Bible chuan Isaia ziakah hetiang hian a sawi, “Ani chuan natnate phurin, kan lungngaihnate pawh a phur nei a; nimahsela, keini chuan lungngaihna tlakbuakah, Pathian vuakah, tihretheihah kan ngai si a. nimahsela a ni chu kan bawhchhiatnate avangin vuak thitlinin a awm a, kan thlamuanna tura thununna chu a chungah a tla a, a vuakna vualtea tihdamin kan awm ta. Kan za hian beram angin kan vak bo va; mahni kawng kawngah kan peng ṭheuh va; Lalpa chuan ani chungah chuan kan zaa khawlohna chu a nghat a ni” [Isaia 53: 4-6]. 

Isua chuan kan ai a awh a; keimah aiawhin kraws-ah khenbeh a ni ta a ni. “Chutichuan, tunah zawng Krista Isuaa awmte tan chuan, thiam loh chantîrna reng a awm tawh lo,” tiin kan dinhmun a nemnghet a ni [Rom 8: 1]. 

Isua chu Lal leh Chhandamtua i nuna i sengluh chiah chuan i thinlung natna chu tihdamin a awm ve nghal ang. Pathian chuan thiam loh chantir i nihna lai chu a en kan daih tawh. Isua Kristia dikna hmanga hliahkhuh chauh a hmu thin. 

Ngaihtuah zui atan. 

Ringtu i nihna zawnah chuan eng ang rilru buaina/thinlung hliam nge i tuar nasat ber? Pathian chuan i buaina chu engtiangin nge a thlir? 

Kraws-ah khan Isuan khan i aiawhin ding lo ta se eng dinhmunah nge i awm i rin? 

Kan sual man bat min tlaksak tih ka hriat reng chuan eng vangin nge felna kawng chu kan la zawh kher ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...