_I Khawthlir Dan Thlak_
- Rick Warren
- August 24, 2025
_"He dan bu hian i ka chu chhuahsan hlek suh se; chu mi thu ziak zawng zawng chu i zawm tlat theih nan chhun leh zan i ngaihtuah lawk tur a ni: tichuan i kawngte chu i lo titluang zel ang a, i lo hmuingil zel dawn nia."_ (Josua 1:8)
Mi zawng zawng hian damchhan tur kan duh - mahse mi tam tak chuan a hmun dik lovah kan zawng ṭhin. I damchhunga i thawh tur chu lehkhabuah emaw, social media-ah emaw, TV-ah emaw i hmu thei lovang. Engnge anih tih pawh i rinthuin i sawi mai mai thei lo bawk.
I nuna Pathian thiltum chu hmun pakhatah chiah i hmu thei ang: Pathian thuah (Bible-ah).
Zir chiannain a tarlan dan chuan tute pawh hian talent 600 aṭanga 700 vel kan nei, mahse a tam zawk chu kan hmang ngai lo. I nuna Pathian thil tum i pawm rual khan talent leh thilpek a pek che tam zawk i hmang thei a ni tih i hria ang.
Jona, Bible-a Pathian zawlnei zinga pakhat khan a nuna Pathian thil tum a dawng. Bible-in heti hian a sawi, _"Amittaia fapa Jona hnenah LALPA thu a lo thleng a, 'Tho la, Ninevi khua, khawpui ropui takah chuan kalla, a chung thu tlângaupui rawh; an suahsualna chu ka hmâah a lo thleng chho ta si a,' tiin."_ (Jona 1:1-2)
Pathianin Jona kha tihtur a pe a ni. Nang pawh a Thu i chhiar chuan Pathianin tihtur a pe ve ang che. Bible i zir nasat poh leh i tihtur i hrethiam leh zual ang.
Pathianin i nuna a Thu a dah theihna turin kawng hrang hrang a hmang ṭhin. A changin Bible chhiar turin i ṭhu a. A chang chuan miin Pathian thu an sawi i hre bawk a. A chang chuan tuna mi ang hi Pathian pawl nan i chhiar bawk. Biak ina inkhawm lai chauh hi Bible keu nan i hmang anih chuan i nuna Pathian thiltum i hmuchhuak ngai lovang.
Bible hi i nunah bettir tlat thung rawh. Hun rei lo te pawh nise nitin Pathian pawl nan hmang rawh. Hun bi siam la, calendar-ah chhinchhiah la, anih loh pawhin i phone-ah Bible chhiar hun tur bik alarm siam rawh.
Josua 1:8-ah heti hian kan hmu, _"He dan bu hian i ka chu chhuahsan hlek suh se; chu mi thu ziak zawng zawng chu i zawm tlat theih nan chhun leh zan i ngaihtuah lawk tur a ni: tichuan i kawngte chu i lo titluang zel ang a, i lo hmuingil zel dawn nia."_
I nuna Pathian thiltum tihhlawhtlin i duh chuan suangtuahna ram kalsan la Bible chhiar rawh. Pathianin i nuna a thil tum te, tipuitling tura a duh che kha vanah a ziak lo. A lehkhabuah a ziak zawk.
Ngaihtuah zui atan.
Eng kawngtein nge i damchhan i zawna i lo hlawhchham tawh?
Bible chhiar kawngah engtiinge hma i sawn theih ang?
Bible chhiar kawngah engnge i tan sawt ber? (Bible bu tak? Phone/computer-a mi chhiar? Bible chhiar sa ngaihthlak? Thusawi ngaihthlak? Nitin Pathian pawlna chhiar?) Engvangin nge hengte hi i tan a sawt ni a i hriat?
[Lettu: Mapuia Fanai]
No comments:
Post a Comment