Saturday, August 16, 2025

PATHIANIN A REMKHAWM CHE I NI

_I Khawthlir Dan Thlak_

- Rick Warren 
- August 16, 2025
_"Ka nu pum chhhunga ka awm laiin ka taksa peng hrang hrang, ka taksa chhung lamte lam hian nangin i siam a. Chutianga ropui taka min siam avang chuan ka lawm e!"_ (Sam 139:13-24, NLT)

Pathianin a duhdan taka a remkhawm i ni. Mi, nung tawh phawt chu a siam vek an ni. Thudik tak i ngaihtuah chuan mak i ti ve ngei ang.

Davida chuan Sam 139-ah heti hian a sawi, _"Ka nu pum chhhunga ka awm laiin ka taksa peng hrang hrang, ka taksa chhung lamte lam hian nangin i siam a. Chutianga ropui taka min siam avang chuan ka lawm e! I hnathawh te chu a va ropui em- engtinnge ka hriatfiah zawh lul ang! Hmun fianrial lai bera siama ka awm lai, ka nu pumchhunga ka awm lai pawhin min lo thlir reng a. Nang chu ka pian hma pawha awm tawh reng i ni."_ (Sam 139:13-16, NLT).

Mihring taksa anga hriatthiam har hi thil tlem te chauh a awm. Mahse i taksa peng hrang hrang te khan an thawk tur tak an thawk ṭheuh, Pathian siam an ni tlat bawk a. Sam 139-ah chuan i nu pum chhunga i lo insiam ṭan aṭang khan Pathianin a thlir reng che a ni tih min hrilh. I insiam dan kimchang a hmu vek- a chhan chu i pian hma reng pawh khan i nunah hmun a nei a, siam chhan che leh tum neiin a hruai che a ni. Nei lo se, tun hi i thleng tawh lovang.

Tihpalh thil thua lo awm ve mai i ni tiin tumah inhnehtir suh. Tihpalh avanga lo awm i ni lo.

Tihpalh avanga nau lo piang an awm lo. Pathian ruahmannaa tel i ni. I nu leh pate ruahmannaah i tel lo mai thei, mahse Pathian remruat i ni. Nu leh pa ṭha tak emaw, sual tak emaw, nu leh pa hrang emaw i nei a ni thei. I nu leh pa-te i hre miah lo a ni thei bawk. I nu leh pa-te chu tupawh lo nise Pathianin i tana a thlan te an ni, a chhan chu nangmah siamna tur DNA dik an nei a  ni. Aman a duh che.

Dan lova piang naupang an awm lo tih hi hre reng rawh. Pathianin ruahmanna a nei vek. Heta i awm chhan chu heta awm turin a duh che a ni mai. Chu chu thlimak tak a  ni.

The Message (Bible lehlin tam tak zinga pakhat) chuan heti hian a let, _"Pathian thil phalna ropui tak hi i lo tem ve tawh em, he finna thuk tak hi? Kanu hriat phak bak a ni a. Kan hrethiam phak ngai lovang. Pathian hrefiah zo kan awm em le?"_ (Rom 11:33-34)

A chhanna chu aih tih hi a ni. Tuma'n Pathian an hrethiam lo. Pathian hi hrilhfiah zo la, Pathian i ni ang. Pathianin min din chhuah dan hi rin zawh thiam loh, sawifiah zawh loh leh thlen phak rual loh a ni. Thil mak tak a ni.

Anih chuan engnge i chhanna ni ta ang? Lawmthu sawi mai rawh. A khawngaih ropui tak leh hmangaihna mak tak avang khan lawmthu sawi rawh. 2 kor. 9:15-ah heti hian kan hmu, _"A thilpek sawi hleih theih loh avangin Pathian hnenah lawmthu awm rawh se."_

Ngaihtuah zui atan.

Pathianin awm atan a duh che avanga lo awm i ni tih hi engnge a awmzia?

Khawiah nge Pathian "thil phalna ropui tak" chu i nunah i hmuh?

Pathianin min duan dan ropui tak hi lawmnain kan chhang let tur a ni. Pathian hnenah a siam che avang leh i hmangaih te a siam avangin a hnenah lawmthu sawiin hun hmang rawh.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...