Friday, August 15, 2025

PATHIANIN ENG VANGIN NGE LEILUNG LEH VAN BORUAK (UNIVERSE) A SIAM

_I Khawthlir Dan Thlak_

By Rick Warren
— August 15, 2025
“A tân engkim awma, a zâra engkim awm bawka tân chuan, fa tam tak ropuinaa a hruai luh zawngin, an chhandamna siamtu kha tuarnate avânga tihfamkim chu a âwm rêng si a.” [Hebrai 2:10]

Thumal pathum “A tirin Pathianin” [Genesis 1: 1] tih hmangin Bible chu bulṭan a ni a. Chung thumal pathumte chu i pawm thei lo a nih chuan hringnun hian awmzia, bulbal, ṭangkaina an nei lo vang. Kan hlutna chu Pathian aṭanga chhuak a ni a, amah chu thil zawng zawng awm hmaa awm a ni. Pathian chu leilung awm hma daiha lo awm tawh a ni a, mihringte awm hma fea lo awm tawh a ni bawk.  

Genesis 1: 1 chuan hetiang hian a sawi, “Atirin Pathianin lei leh van a siam a,” tiin. Chu bung kal zel chuan Pathian aw-ka chhuak hmanga leilung leh vante siama nih dan kan hmu. Vawi eng emaw zat Genesis 1 ah chuan “Pathianin a ti…,” “Pathianin a ti…” “Pathianin a ti” tih kam hmu. 

Bible chuan thilsiam dang Pathianin a siam dan chu chiangkuang takin min hrilh lem lo. Eng vangin nge siam an nih lam chu ngunthluk zawkin a sawi a ni. 

Eng vangin nge Pathianin khawvel a siam? “Vân siamtu chu Pathian a ni, Lei pawh a siam a, nghet takin a din hi. Chhe rem rumin a siam lo va, Chênna tlâkah a siam a ni” tih kan hmu. Pathianin khawvel chu amah inenkawl thei turin a siam a. Ni aṭanga a tawk chiaha hlaah a dah a, dik taka vir thei turin a siam a, vawt lutuk lo leh lum lutuk lo turin a siam a ni. Nunna chawm thei tur tawkin a siam a ni.  

He Bible thu hi a ṭha ka ti hle ṭhin: Chhe rem rumin a siam lo va, Chênna tlâkah a siam a ni,” tiin a sawi. [Isaia 45: 18] 

Mahse eng vangin nge Pathian chuan nunna chawm turin lei chu a siam? Chu zawhna chhanna chu Hebrai 2: 10 ah kan hmu a ni, “A tân engkim awma, a zâra engkim awm bawka tân chuan, fa tam tak ropuinaa a hruai luh zawngin, an chhandamna siamtu kha tuarnate avânga tihfamkim chu a âwm rêng si a,” tiin. 

Pathian chuan a ropuina atan lei chu a siam a ni – a faten chu ropuina chu chhawm nung tur chuan a duh a ni. A fate chu tu te nge ni? Nangmah leh keimah hi kan ni e. 

Tuna i ṭhut meknaah khan engah nge i ṭhut ni ang – I boruak hip leh chiah tur i hip chhan kha eng nge ni a, i mar kha engah nge a chet leh – a chhan ka hrilh thei ang che. Pathianin a siam chhan che chu a hmangaih vang che niin a chhungte zinga tel ve turin a duh che a ni. 

Sam 8: 5 chuan hetiang hian a sawi, “Pathian aia hnuai deuh chauhvin i siam a, Ropuina leh chawimawina chu i khumtîr a,” tiin. 

Engtikniah emaw “engah nge” tih zawhna i inzawh leh hun chuan – Pathianin engah nge khawvel a siam? Pathianin eng vangin nge min siam? Tih zawhna i inzawh hun chuan hei hi hre reng ang che: Pathian chuan leilung leh van pumpui a siam chhan chu nang leh kei chu a chatuan chhungte zinga tel tura min duh vang a ni. 

Ngaihtuah zui atan. 

• Pathianin leilung leh vante a siam dan ai chuan i siam chhan zawk chu i ngaihtuah ngun zawk em? A eng chu pawimawh zawk nia i hriat? 

• Pathian chuan mawina leh duhawmna chuan min thuam a tih awmzia chu ngun takin i lo ngaihtuah ngai em? 

• Pathian chuan a hmangaihna i chunga a lantir theihnan a siam che tih chuan engtiang takin nge nangmah a khawih che? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...