_I Khawthlir Dan Thlak_
- Rick Warren
- August 17, 2025
_"Thil chhe thei, tangka leh rangkachaka tlan in ni lo va, beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a."_ (1 Petera 1:18-19)
Tute pawh hian zahawmna/ropuina kan duh vek. Mi zawng zawng hian hlutna kan nei tih leh kan nunna hi a pawimawh a ni tih hriat kan duh ṭheuh.
Anih leh engin nge zahawmna chu min pe le? Miin kawng hrang hrangin zahawmna an zawng- hausaknaah te, hnaah te, mawinaah te, mipat-hmeichhiatnaah te. Mahse chung hmunah chuan zahawmna i hmu ngai lovang. Khawvel tehnain chung chu i nei vek a ni thei- mahse chhungril erawh a ruak tho ang.
Engvangin nge? Chung aia tam atana siam i ni tlat.
Khawi atangin nge zahawmna tak tak hi a rawn thlen? Heng thudik pathumte atang hian.
*Pathianin i tan a Fapa, Isua a hlan.* Pathianin thihnaa tlanna khawp hiala hluah a ngai che. Bible-in heti hian a sawi: _"Thil chhe thei, tangka leh rangkachaka tlan in ni lo va, beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a."_ (1 Petera 1:18-19)
Eng ang chiahin nge hlutna hi teh anih? A leituin a man a pek phal zat aṭangin a ni. Isuan i tan a man pek a inhuam - chhandam i nih nan - ama nun ngei hlanin. "I tel lova nun ai chuan ka thi zawk ange" a tihna tluk a ni. Chutiang tak chuan Pathian tan i hlu a ni.
Chuvang chuan The Message chuan heti hian a letling: _"Tupawh zahna nen thlir rawh"_ (1 Petera 2:17) tiin. I mi tawh apiang kha Isuan a nunna a hlansakte an ni. Chuvang chuan tupawh mai hian zah an phu a ni.
*I chhungah Thlarau Thianghlim a cheng.* I nun leh thinlunga cheng tura Isua Krista i sawm rual khan Thlarau Thianghlim i sawm ve nghal tihna a ni. I hrechiang zual zel a, a duh dan anga nung tura a zirtir rual chein a aw i man thiam zel bawk a ni.
Bible chuan heti hian min zirtir, _"A nih leh, in taksa chu,in chhunga awm Pathian hnen aṭanga in hmuh Thlarau Thianghlim in a ni tih in hre lo em ni le? Mahni ta pawh in ni lo va, mana lei in ni tawh asin."_ (1 Kor. 6:19). Pathian a Thlarau hi thil hluihlawn mai mai chhungah a dah tawp lovang. I chhunga Thlarau Thianghlim a chen avangin zahawmna i lo nei ta a ni.
*Isuan zahawmna thar a pe che.* Isua Krista Lal leh chhandamtua i pawm rual khan i nun a tidanglam a; a siamṭhain nun thar a pe che. Bible-ah heti hian kan hmu, _"Chu mi avang chuan tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta."_
Suala i tluk apiang khan i zahawmna tihchhiatin a awm. Kha i zahawmna kha zahnain a thlak zel a ni. Mahse Isua hi zahawmna siamṭha zeltu a ni. Chhamdam tura a chunga rinna i nghah chuan bul a ṭan ṭhattir che a ni. A ngaidam che a zahawmna a pe thar leh che a ni.
Tupawh niin engpawh lo ti tawh mahla i nunna khan zahawmna a nei - a chhan chu i tan Isua a thi a, Pathian Thlarau i hnenah a awm a, Isua nihna thar a pe che a ni. Mualpho taka awm reng a ṭul tawh lo. Pathianin zahawmna a pek che angin nung rawh.
Ngaihtuah zui atan.
Isua ni lo eng thil dangah nge zahawmna i lo zawn? Chungte chuan engtinnge an kiansan che?
Pathian hnen aṭangin i zahawmna a lokal a ni tih i hriatin i nunah eng danglamna nge a thlen?
Bible chuan "mi zawng zawng zahna nen en rawh" a ti a. Mimal emaw, pawlho emaw, zahna nena i en loh an awm em? Zahna nena i en theih nan ṭawngṭai rawh.
[Lettu: Mapuia Fanai]
No comments:
Post a Comment