Wednesday, August 27, 2025

ISUAN PATHIAN HNEN KAL TLANG THEIHNA MIN PE

_I Khawthlir Dan Thlak_

- Rick Warren
- August 27, 2025
"Nimahsela, engkim hi Pathian hne ata chhuak a ni a, ani chuan Krista avangin amah nen inremin min siam a, inremna rawngbawl hna min pe a. Khatia, Pathianin Kristaah chuan khawvel hi amah nen inremin a siama, an bawhchhiatnate chu bawhchhiatnaa ruatsak lova, inremna thu min kawltir kha." 2 Korinth 5:18-19.

Isua krawsa a awm lai khan, i ai a awh ringawt a ni lova. Pathian nena in inlaichinna siamṭhain palai hna a thawk a ni.

Palai chuan mi chi hnihte chu a hruai khawm ṭhin. Bible chuan sual avangin Pathian laka tih hran kan nih thu min hrilh. Pathian chu lehlamah awmin, a lehlamah keini mi sualte chu kan vaiin kan awm a. Kan inkarah min daidangtu a awm a, keimahni chuan kan kal tlang zo lo a ni.

Mahse chanchin ṭha a lo thleng e! Isua chu min hruai khawm turin khawvelah a lo kal a. Kan palai a ni a-Pathian nena kan inkara leilawn siamtu a ni. 

Bible chuan, "Nimahsela, engkim hi Pathian hne ata chhuak a ni a, ani chuan Krista avangin amah nen inremin min siam a, inremna rawngbawl hna min pe a. Khatia, Pathianin Kristaah chuan khawvel hi amah nen inremin a siama, an bawhchhiatnate chu bawhchhiatnaa ritsak lova, inremna thu min kawltir kha," 2 Korinth 5:18-19. Isua chu nang leh Pathian inkara lei dawhtu a ni.

Thuthlung Hluiah, Isua khawvela a lo kal hmain, miin Pathian an pan theihna awm chhun chu puithiam kal tlang chauhin a ni. Juda puithiamte chauh chu hmun Thianghlimah-Maichama hmun thianghilm berah chuan kal phal a ni a. Chu pawh chu kum khatah vawi khat chiah a ni. He puithiam hian Pathian hmaah Israel mi zawng zawng ai a awh a, mipui leh Pathian inkara palai a ni.

Mahse, Isua khawvela a lo kal khan mi tin tan mahnia Pathian hnen pan theihna kawng a hawng a ni. Puithiam emaw, mi thianghlim emaw, pastor emaw, tu emaw ber kal tlanga i pan kher a ngai tawh lova. Nangmahin Pathian i be pawp thei a ni.

Isua hi kan puithiam leh palai a ni a. Chuvangin kan ṭawngṭai apiangin he ṭawngkam "Isua hmingin" tih hmang hian kan titawp ṭhin. Hemi hmanga ṭawngṭai tihtawp hi phut luih tlat a ni hran lova, Isuan mahnia Pathian hnen pan thei tura kawng min hawnsak avang leh kan duh apiang kan dil theih avanga a dik a ni tih kan pawmna a ni. Pathianin a ngaithla che a, a pawm che a, a ngaihsak che a ni tih ring tlat ang che.

Isua avangin Pathian nen inzawma, inpawl leh inbe theiin i awm a. I tṭhian nih a duh a ni! Vawiin aia Amah biak leh amah nena hun hman dunna hun ṭha hi a awm chuang lo.

Ngaihtuah chhunzawm atan

I ṭawngṭai hian i ṭhian angin Pathian hi i be ngai em? Eng vangin nge chutianga i tih emaw, eng vangin nge chutianga i tih loh?

Tlang taka Pathian hnena ṭawngṭai i hmuh hian eng ang danglamna nge a thlen?

Ni tina Pathian pawlna hun tam zawk i neih theihna turin eng thil nge thlak danglam ngai?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...