Thursday, August 28, 2025

HLAUHNA TEL LOVIN THIH EMAW DAM EMAW

_I Khawthlir Dan Thlak_

By Rick Warren
— August 28, 2025
“Nangmahnia awma chu khawvela awm ai chuan a ropui zawk avangin.” [1 John 4:4]

Isua khawvela a lo kal chhan chu thihna leh sual hnathawh tihboral chu a ni. Bible pawhin chutiang chuan a sawi, “Pathian Fapa lo lan chhan ber chu Diabola hnathawhte a tihboral theih nan a ni,” tiin [I Johana 3:8] 

Sual hnathawh chu engnge ni? I thinlung chu lungkham, mahni inkiltawihna, inthiamlohna, thinrimna leh buaina hmanga tihbuai chu a ni a – nangmah inngainep leh dinhmun chhia, beisei bo leh tum mumal nei lova awmtir che chu a tum a ni. 

I nuna Setana hmanraw langsar ber chu hlauhna a ni. Mahse hlauhna chu Pathian aṭanga chhuak a ni lo. Bible chuan, “Hmangaihnaah chuan hlauhna reng reng a awm lo… hmangaihna famkimin hlauhna a hnawt chhuak ṭhin a ni,” tiin a sawi hial [I Johana 4: 18] Chuvangin eng emaw hlauh i neih chang apiang chuan a phena awm chu Pathian a ni lo tih hria ang che. 

Bible chuan, “Pathian chu hmangaihna a ni,” tiin a sawi [I Johana 4: 8]. Hmangaihnaah chuan hlauhna a awm loh avang leh Pathian chu hmangaihna a nih zawk tlat avangin amah a awmna hmunah chuan hlauhna chu um bovin a awm ṭhîn tih hre tlat ang che. 

Miten an thil hlauh langsar hmasa ber chu thih hlauhna chu a ni, Setanan chu chu sal anga anmahni phuarna atan a hmang fo. 

Vanrama chengte leh ka mi hriat vanrama awm apiangte ka ngaihtuah chang chuan kal ka chak zual sauh ṭhin. He leilung chhiatna leh tlakbalna ka chhut apiangin he hmunah hian awm reng tur kan nih lohzia ka hre thar bawk – kan awm reng dawn loh avangin Pathian hnenah lawmthu ka sawi nawn hial ṭhîn. 

Hebrai 2: 14- 15 chuan hetiang hian a sawi, “Naupang a tihte hi tisa leh thisen nei an ni a, ani pawh chutiang chu a lo ni ve ta a ni. Tichuan, thihna chunga thuneitu Diabola chu, a thihna avângin a titlâwm a, dam chhûnga thih hlau rêng rênga awm ṭhîn, hlauhna bawiha tângte chu a chhuah ta a ni,” tiin.

Thih chu ka hlau lo – a chhan chu Isuan ka tana a hnathawh chu ka hre chiang a ni. Pathian ṭhian i nih a, i kalna lam tur i hre chiang a nih chuan amah hmuh chu thil hlauhawm a ni ngai lo vang. 

He khawvel thunun hleih theih mang lova buai zelah hian awm reng ka hlau zawk, he khawvel sualin thuneihna sang tak a channa hmunah hian. 

“Lalna leh thuneihna te chu hlip thlain, kraws-ah chuan chungte chu hnehin, a langin hriattir nan a hmang ta a,” [Kolossa 2: 15] Ringtu i nihna zawnah chuan i hlauh a ngai lo, a chhan chu, “Nangmahnia awma chu khawvela awm ai chuan a ropui zawk avangin.” [1 John 4:4]

Isua kianga kalte tan chuan hlauhna chu thih leh damah chuan a awm tawh lo. I mangang a, eng emaw hlauh i nei a nih chuan Pathian kutah chuan tlu lut ang che, a thu leh a thutiam te, a hmangaihnate chu inhrilh thar leh bawk ang che. 

Ngaihtuah zui atan. 

• Ringtu ṭhenkhatte chu an chhandamtu atana Isua an thlan hnuah pawh chuan eng vangin nge hlauhna an la neih fo? 

• Vanram i lo ngaihdan chu han sawi teh? Vanram chu eng ang nge nia i rin? 

• Pathian i rinna chuan eng tiang takin nge khawvel i thlir dan chu a tihdanglam? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...