_I Khawthlir Dan Thlak_
By Rick Warren
— August 29, 2025
““Amaha ka awm reng ṭhîn” titu chu ama awm ang bawk khan a awm ve tur a ni.” [I Johana 2:6]
Pathian Thutakah i nun chu i nghat a nih chuan a duh dana nung turin i ngaihtuahna te chu a her danglamsak ang che. Mahse min hual veltu thlirna dik lo tam tak karah hian thil pawimawh ber chu engtin nge i thlir ngar ngar theih ang? I thil pawm chu engtin nge i chet chhuahpui ang? I rin dan chuan engtin nge i nungchang a tihdanglam ang?
A awmzia chu, engtin nge i nun ang?
Zawhna pawimawh tak a ni, mahse chanchin lawmawm ka hria: Pathian chuan nun dan tur min kawhhmuh, he khawvel tan hian Isua chu a rawn tir a, entawn tur mi famkim a ni. Bible chuan, ““Amaha ka awm reng ṭhîn” titu chu ama awm ang bawk khan a awm ve tur a ni,” tiin a sawi [I Johana 2:6].
Ni eng emawzat chhung chu Isua nun dan eng emawzatte kha kan zirho leh dawn a ni.
Vawiin hian a hmasa ber kan zirho ang: Isua anga nun tih awmzia chu hriat thiamna nena nun a ni.
Hriat thiamna tih awmzia chu uluk taka thil thlithlai tihna a ni. Zirtirna thar i thlir chang chuan zawhna i lo zawt ang, “A dik ang em? Pathian thlirna nen an inmil em? Nge mite thil uar satliah mai mai zawk?
Bible chuan Rom 12: 2 ah chuan, “He khawvel dan ang hian awm suh ula; Pathian duhzawng, a ṭha leh lawm tlak leh, ṭhat famkim chu in hriat fiah theih nan, in rilru a thara awmin lo danglam zawk tawh rawh u,” tiin a sawi. Isua zuitute chu hriat thiamna nen an nun a ngai a – an nun awmzia chu an chhut ngun a, an hriat thiam a ngai.
Isua chuan hetiang hian a sawi bawk a nih kha: “A lan angin ngaihtuah suh ula, fel takin ngaihtuah zawk rawh u,” tiin [Johana 7: 24]
Isua chuan a zirtirte chu ringhlel leh buai lo turin a duh a – a chhe lam hlir thlirtu ni lo turin a duh. Chutih rual chuan Isua chuan amah zuitute chu an ngaihtuahna hmang ngun turin a duh – puitling lo deuha khawsa lovin chik taka ngaihtuah turin a duh a ni.
Entirnan, i nihna nena inkalh hlauh hla chu ngaihtuah mang lovin i lo sa ve tawh em? TV-ah i thil tih ngai miah lo titute chu i lo thlir doh doh tawh em? Khawvel chuan intihhlimna [entertainment] tiin a sawi a, mahse a nihna takah chuan tute emaw chuan i thluakah thlirna rilru hruai kawi thei eng emaw an tuh mek a ni.
I rilrua awmte pawh chu Isua chuan thlifim tur chuan a duh che: “Chutichuan, i chhunga awm chu thim a lo ni dah law maw, fimkhur rawh,” tiin [Luka 11:35].
I nitin hun i hman mek lai chuan, ngun takin ngaihtuah la, “He khawvel dan ang hian awm suh ula; Pathian duhzawng, a ṭha leh lawm tlak leh, ṭhat famkim chu in hriat fiah theih nan, in rilru a thara awmin lo danglam zawk tawh rawh u,” tih chu hre thar fo vang che [Rom 12:2].
Ngaihtuah zui atan.
• I khawvel thlirna chu ngaihtuah nawn la, khawvel i enna mit ngei mai chu. Krista leh a zirtirnaah an innghat em, khawvelin en tura an tih ang che chuan i lo en ve mai zawk em?
• Eng dinhmun emaw zirtirna thuhla emawah chuan Pathian chuan thil hriat theihna a pe tawh che em?
• Vawiin hian thil hriat thiamna chu ni dang aiin i mamawh zual em? Pathian hnenah chuan thil hriat thiam lehzualna chu dil ang che.
[ *Lettu:* Peka]
No comments:
Post a Comment