Wednesday, August 13, 2025

THUDIK I HRIAT DAN TUR

_I Khawthlir Dan Thlak_

- Rick Warren
- August 13, 2025
"Isuan a hnenah, "Keimah hi kawng leh thutak leh nunna ka ni, keimaha kal lo chu tu mah Pa hnenah an thleng ngai lo," Johana 14:6.

Tunlai khawvel chuan thudik/thutak i hre thei lovang a ti a. Mahse nang chuan i thei? Thudik/thutak hi hriat theih a ni teh meuh mai. Dik tak chun thutak hi hriat chhuah theih a ni. Hetiang hian:

*Thilsiam hmangin Thutak i hre thei.* Thutak chungchang te, Pathian chungchang te hi thilsiam te en leh science zirna hmangin i hre thei. Rom 1:20 chuan, "A thil hmuh theih loh (a chatuan thiltihtheihna leh a Pathianzia chu khawvel chu khawvel siam tirh ata fiah taka hmuhin a awm a, thilsiamah chuan a lang a ni, chuvang chuan, chhuanlam tur an nei lo," a ti. Sephung chi hrang hrang sâng tel i hmuh hian Pathianin ze hrang hrang a lawmzia i hre thei ang a. Tlâng kâng i hmuh hian Pathian thil tihtheihzia i hmu ang. Thilsiamte nena rual tlang taka kan inzawm dan i zir chuan Pathian thil rel felzia i hre thei ang.

*Chhia leh ṭha hriatna hmangin thutak i hre thei.*
The Message Bible chuan, "Jentail te chuan Dan chu an hre ve lo na a, Dan thu tum chu an pianpui ze phung remzawng a nih avangin an ti a. Dan chu an hnena pek ni ve lo mah se, Dan nei ang an ni. An chhia leh ṭha hriatnaah thiam inchantir leh inchantir loh nachang an inhriat dan aṭang hian Dan thupek chu an thinlungah a inziak a ni tih a lang," (Rom 2:14-15). Thil dik leh dik loh hriatna hi mitinah a awm vek a. Mi veivah buaina kara nu upa lam tawh va nam ai chuan kawng a kân tur ṭanpui kha a ṭha zawk tih kan pawm tlang vek ang. Chumi hre tur chuan 'thlarau' mi nih kher pawh a ngai hran lo. I pianpui finna aṭangin thil dik leh dik lo chu i hre thei a ni, a chhan chu Pathianin mi tin hnenah chhia leh ṭha hriatna a pek vang a ni.

*Ngaihtuahna hmangin thutak i hre thei.*
Thutak zawng zawng hi rinna hmanga i pawm vek kher a ngai hran lo. Thutak chu i thlir thei a, i enchhin thei a, i finfiah thei bawk. Bible chuan, "I kalna tur en ngun la, i tih tawh chu a hlawhtling ang," (Thufingte 4:26) a ti. Pathian chuan thle kawia hmanhmawh chung turin a duh lo che a. Ani chuan ngaihtuah a, thlirna hun hmang turin a duh che a ni. "Kawng dik ka zawh em?" tih inzawt la. I inringhlel a nih chuan endik thuai ang che.

*Pathian thupek hmangin thutak chu i hre thei.*
Bible hi inzirtirna leh inkawhhmuhnain a khat tlat a. Chu chu i ring tur a ni. 2 Timothea 3:16 chuan. "Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sâwt bawk a ni," a ti.

*Thutak chu Krista kaltlangin i hre thei.*
Thutak hre turin Pathian chu khawvelah mihring angin a lo kal. Bible chuan Isua chu khawngaih leh thutakin a khat a, thutak tisaa lo chang a ni a ti bawk. Thutak hi chet dan dik a ni mai lova, thutak chu mihring a ni. Bible a chiang leh hriat lar tak zinga mi chu, "Isuan a hnenah, "Keimah hi kawng leh thutak leh nunna ka ni, keimaha kal lo chu tu mah Pa hnenah an thleng ngai lo," Johana 14:6 tih thu hi a ni. Thutak/thudik hriat theihna kawng ṭha ber chu Isua hriat hi a ni.

Engmah i hre tak tak thei lo tih ngaihtuah a awl viau ang. Mahse i thei a ni! Pathian chuan thilsiam te hnenah a pe a, chhia leh ṭha hriatna, ngaihtuahna, a thupek leh a berah chuan Krista a pe che a, i hriata thutaka i nun theih nan a ni.

Ngaihtuah zui atan.

Thilsiam i han en hian Pathian chungchangah eng thil nge i zir chhuah le?

Engtik hunah nge i chhia leh ṭha hriatna chuan thil dik leh dik lo hre tura a ṭanpui che?

Engtin nge Isua hre tura i ṭanlakna chuan thuk zawka thutak hre tura a ṭanpui che?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...