_I Khawthlir Dan Thlak_
- Rick Warren
- August 10, 2025
_"He khawvel dan ang hian awm suh ula; Pathian duhzawng, a ṭha leh lawm tlak leh, ṭhat famkim chu in hriatfiah theih nan, in rilru a thara awmin lo danglam zawk tawh rawh u."_ (Rom 12:2)
Tute pawh hian thil thlir dan- kan innghahna tur rin dan kan nei vek. Chu kan thil thlir dan chuan engkim mai: in inlaichinna, i hnathawh, sum i hman dan leh tawrhna i hmachhawn dan a hril vek. Chuvang chuan Pathianin a siam chhan ang che a nung turin engtinnge i thil thlir dan i tihchak ang?
*1. Thutak zir chiang rawh.* Isuan in satu pahnih chungchang a sawi a- pakhat chuan ṭiau dup chungah in a sa a, pakhat chuan lungpui chungah a sa thung. Thlipui a lo thawk a, ṭiau dup chunga in sak chu a rawn nam thlu mai a, mahse lungpui chunga in sak erawh nghet takin a ding thung.
He thawnthuin a sawi tum chu hei hi a ni: I nun kha mi ngaihdanah emaw Pathian thutakah emaw i din dawn. Chatuan thutak chunga i din chuan harsatna khirhkhan ber pawh tawk la i ding chang thei ang.
Bible chuan heti hian a ti, _"Thutak chu zir la hnawl ngai suh. Finna, inthunun theihna leh hriatthiamna nei rawh."_ (Thufingte 23:23, NCV). Pathian thu zirin, kristian lehkhabu ṭha tak tak chhiarin, kohhran zinga tel zelin thutak chu i nei thei.
*2. Thil dik lo hriat tum rawh.* The Message chuan heti hian a letling, _"I hriat apiang awih mai suh. Pathian chanchin sawitu zawng zawng hi Pathian aṭanga chhuak an ni lo. He khawvelah hian thuhriltu lem tam tak an awm."_ (1 Johana 4:1). Pathian thutak sawi nia inchhal ṭhenkhatte hi chu an ni hauh lo. Mahse Pathian thutak i hriat chuan ziritrna dik lo i hre thei ang.
*3. Khawvel lam hawi tawh lovin Pathian Thu lam hawi rawh.* Bible chuan khawvel ngaihhlut thilte ngaihlu ve tawh lo turin min ti, khawvel thlir dan anga thlir tawh lo turin min ti: _"He khawvel dan ang hian awm suh ula; Pathian duhzawng, a ṭha leh lawm tlak leh, ṭhat famkim chu in hriatfiah theih nan, in rilru a thara awmin lo danglam zawk tawh rawh u"_ (Rom 12:2). Duhthlan tur i nei: ngaihdan danglam rengna khawvel milin nge i kal dawn Pathian chatuan Thu ang zawkin?
*4. Pathian ngaihtuah ang zel ngaihven rawh.* The Living Bible chuan Isua thutiam heti hian a letling: _"Pathian ram hi ngaihsak bera i neih chuan vawiin aṭang hian Pathianin i mamawh apiang a pe ang che"_ (Luka 12:32). Ngaihsak hmansak pakhat chiah i nei thei. Pathianin a hmasa ber nih a duh - tuizawng leh tum dang chu a pahnihna ni rawh se. Amah leh a duhzawng i dah hmasak ber chuan a dang zawng chu a ngaihtuah tur thu min tiam a ni.
Mi zawng zawngte hian thil awmzia, pawimawhna leh awm chhan an zawng mek a ni. Ṭiau dung chunga in i sak chuan- heng thuneihna, nawmsakna leh hausakna angah te hian - i zawn i hmu ngai lovang. Pathian thuah innghat zawk la, a duhzawng chu zawng zawk rawh. Tichuan thlipui pawhin a tihchhiat theih loh thil thlir dan i lo thiam ang a, danglam lo, chhan neiin i nung tawh ang.
Ngaihtuah zui atan.
Engah nge i nun i inngah? I innghahna chu engtinnge i tihchak ang?
Zirtirna i ngaihthlak hnuhnungho kha ngaihtuah let teh. I lo pawm em em, mahse dik lo ni a lang si engnge?
Eng kawngtein nge Pathian thu ni lovin khawvel ngaihhlut thilte i lo ngaihven ṭhin? Engtinnge i tihdanglam theih ang?
[Lettu: Mapuia Fanai]
No comments:
Post a Comment