Thursday, November 12, 2026

HRUAITU ROPUITE FIMKHUR TAKIN AN TAWNG

_Hma Hun Eng Zawk Nei Turin_

By Rick Warren
November 12, 2026
“Ṭawng mawi lo rêng rêng hmang suh u, mi siam ṭha thei tûr chauh in ka aṭangin chhuak rawh se; chutichuan, a ngaithlatute tân a lâwmawm bawk ang.” Ephesi 4:29

In school emaw, hnathawhnaah emaw, in chhungah emaw, nupa nunah emaw, mite nena in inlaichinnaah emaw thil thlak danglam i duh chuan midangte i biak dan chu a pawimawh em em a ni tih hria ang che. 

Nehemiah-an Lal Artexerxes-a no kengtu hna Jerusalem kulh bang siamṭha tura a kalsan dawn lai khan a khaw mite nena inkawm ngeih kha ṭulin a hria a. A ruahmanna an tel ve dawn chuan anmahni anga a ṭawng a ngai a ni tih a hria, pawn lam mi ang ni lovin a be hlawm a nih kha. 

Bible chuan, “Kan chan a chhiatzia hi in hmu a, Jerusalem a ram tih te, a kawngkhârte a kâng tih te pawh in hria a; hawh u, sawi chhiat kan nih tawh loh nân Jerusalem kulh chu i din leh ang u,” tiin [Nehemia 2: 17]. 

Nehemiah khan “Ka” ti lovin “Kan” a ti zel a ni. “Keimah” ti lovin “Keimahni” a ti zel bawk. A ṭawngkam khan engnge a thawh? Inlaichinna a siam a ni. Kut zung chala kawkin, “Vawiin hian nangmahni ṭanpuina hna chu ka thawk zung zung dawn a ni, nangmahni lah chu lung paih darh zingah in khawsa mai mai si a,” a ti miah lo. Chutianga ti lo chuan, “Hei hi kan zavaia buaina a ni. Pathianin min awmpui ang a, kan zavaiin kan thawk tlang dawn nia,” tiin a sawi a nih kha. 

Hruaitu ropuiten thil tihtum an neih chuan thawhpui tur an buatsaih ṭhin. Chu chu hruaitu nihna awmzia ber chu a ni. Hruaitu ropui chuan ding chhuakin midang demna ringawt an chhak chhuak lo vang. Mawhphurhna la ngamin an che ṭhin. 

A chang chuan i nunah buaina i hmachhawn ang a, chinfel chu nge i tih tur ni a, phunchiar ve mai chu tia i inngaihtuah vang vang chang a awm ang. Midang i dem apiang chuan i phurna hrim hrim chu a chuai ve zel ang. A chinfelna lam chu i ngaihtuah a nih erawh chuan i lo phur thar ve leh thung ang. 

Ephesi 4: 29 chuan, “Ṭawng mawi lo rêng rêng hmang suh u, mi siam ṭha thei tûr chauh in ka aṭangin chhuak rawh se; chutichuan, a ngaithlatute tân a lâwmawm bawk ang,” tiin a sawi. 

I thusawi hmanga mite i tihpumkhat a, tih an duh em em thil eng emaw in tihho chuan thil ropui nangmahah chuan a lo thleng tihna a ni. 

Ngaihtuah zui atan. 

• Nitina mite nena in inbiakna thuah “keimah” tih aia “keimahni” tia i thlak avanga thil lo danglam daih tur chu engnge ni? 
• Pathianin “thawhhona” [teamwork] tih tawngkam a hman chuan school, hnathawhna, khawtlang, inah chuan engnge danglamna lo thleng thin? 
• Sam 3: 3 kha han chhiar teh. He chang hian engtin nge mite nena in indaidanna hlipin inlaichinna a siamsak theih ang che? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...