Wednesday, November 11, 2026

I DUHTHUSAM ATAN PATHIAN HUN RUAT RING NGAM RAWH

_Hma Hun Eng Zawk Nei Turin_

- Rick Warren
- November 11, 2026
"Engkim tihna hun dik leh tih dan dik a awm," Thuhriltu 8:6 (GNT).

Pathianin duhthusam a pek che chu rang taka tih nghal ngai a ni lo fo. Bible chuan "Engkim tihna hun dik leh tih dan dik a awm," Thuhriltu 8:6 (GNT) a ti.

Baseball inkhelha ball vawmtute hian hun dik pawimawhzia an hre chiang hle. Ball vawmtute hian ball rih zawng inang 5 1/4 ounce tho an vawm a, homeplate aṭanga feet 60 leh inches 6-ah tho an ding vek a. Mahse thiam leh thiamlo inkar danglamna chu hun bi hi a ni. Ball vawmtu hun bi dik lo chuan inkhel a tichhe thei a, a tiṭha thei a ni.

Hun bi entirna ṭha tak dang chu Nehemia bung 2-ah kan hmu. Nehemia chuan Jerusalem siamṭha tura a duhthusam tihhlawhtlinna atan hun bi pawimawhzia a hria a. Khawpui chhungah tawtawrawt leh flag nen ropui taka lutin, "Chhanhim turin ka lo thleng e," tiin  a puang thei a.

Mahse Nehemia chu Jerusalem a thlen hnu ni thum chhung chu a ngawi reng a. Chung ni thum hun hmasa lam chhung chuan eng nge a tih? Ṭawngṭai mi a nih avangin ṭawngṭaiin a hun a hmang ngei ang? Ruahmanna siam thiam a ni bawk a, a thlir a, a ngaithla a, a zir vel a nih a rinawm.

Hun bi entirna ṭha ber chu Isua nunah kan hmu. A hun bi chu a dik famkim thlap a ni. A chang chuan, "Ka hun a la thleng rih lo," tih thu hi a sawi fo ṭhin. He thu hi inneihnaa thilmak ti tura a nuin a beisei lai khan a nu hnenah a sawi a. A unauten khawvel hmaa a thiltihte hmanga inlan tura an tih lai khan a sawi bawk a ni.

Pathian pawhin a Fapa tir turin kum sang tam tak a nghak a. Bible chuan, "Nimahsela, a hun bi a lo kim khan fa nihna kan hmuh theih nan, Dan hnuaia awmte chu tlan turin Pathianin a Fapa, hmeichhe hrin, Dan hnuaia lo piangin a tir chhuak ta a," (Galatia 4:4-5) a ti.

Eng vangin nge Pathianin Isua chu khatih hun lai khan tir nge a nih kan hre lo, mahse a hun ruat chu a dik famkim a ni tih kan hria. Nehemia nunah pawh hlawhtlinna atana hun dik pawimawhzia kan hmu.

Pathianin duhthusam a pek che pawh chutiang bawk chu a ni. A hun ruat chu ring mai rawh. Tunah chuan i hrethiam rih lo a ni mai thei, mahse a ruahmanna chu a ṭha famkim tih i ring thei a ni.

Ngaihtuah zui atan

Hun bi dik lo avanga thilṭha tak tihchhiata awm i hmu tawh em? Eng nge lo thleng?

I nun eng lai berah nge i chet phut phut a? Eng laiah nge i dawhtheih?

Isuan, "Ka hun a la thleng rih lo," ti a a sawi hian hun dik leh kawng dik a thil ti turin engtin nge a fuih che?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...