Friday, October 9, 2026

THLARAUVA RAH CHHUAH DAN

_Hun Harsa Atana Ruahmanna_

By Rick Warren
October 09, 2026
“ _Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te a ni zâwk e; chutiang kalh zâwngin Dân thupêk rêng a awm lo ve_ .” [Galatia 5:22-23]

I nuna Pathian hnathawh zawng zawngte chu a bulaha chuan Isua i lo an zel theihna tur a ni. 

Rom 8: 28-a thutiam kan hmuh hi a ropui takzet: “ _Tin, Pathian hmangaihtu, ama ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria_ ,” tiin. Mahse chu chuan awmzia a nei thuk vak lo vang, a lehpek chang i chhiar hma chuan, “ _a hriat lâwkate chu ama Fapa ang taka awm tûrin a ruat lâwk si a, a Fapa chu unau tam takte zînga fa tîr a lo nih theih nân_ ,” tih chu [Rom 8: 29].  

Pathian chuan a chhungte zinga awm turin a duh satliah lo che. Pathian chhungkuaten nungchang leh awm dan an neih chu nei ve turin a duh che a. Thlarauva ṭhang lian turin a duh che. Thlarauva i entawn tur chu Isua a ni.  

Tichuan Isua chuan tunge a an ber ang? Isua nihna tarlanna ṭha ber chu Thlarau rah Galatia 5: 22-23 ah chuan a hmuh theih: “ _Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te a ni zâwk e_ ,” tiin. 

Pathian chuan rah chhuah tura a duh che chu chutiang i chhuah theihna tur hmun leh i zirna tur hmun chu a ni ṭhin. 

Ngilneihna chu mi fel takte bulah chuan i zir thei lo; lungawina pawh i duh zawng zawng i neihna dinhmunah chuan i zir thei hek lo vang. 

Tichuan Pathian chuan mite hmangaih thiam tur chuan mi hmangaih awlsam takte bulah chuan a dah ngai lo ang che; hmangaih harsate bulah chuan a dah ṭhin zawk che – chung chu “lehkha thap thianghlim” ka ti mai ṭhin. 

An duh dan anga thil a kal lai chuan tute pawh an hlim mai zel a. Mahse Pathian chuan lawmna tak tak chu tuarna, lusunna leh rilru natna hmunah a zirtir ang che. 

Muang taka awm chu buaina awm lohna hmunah chuan a harsa hauh lo. Pathianin muanna a zirtir lai che chuan buaina leh innghirnghona chu i chungah a thlen a phal ang [Philipi 4: 7]. 

Engtin nge Pathian chuan dawhtheihna a zirtir che? Sawrkar Pisa lianah rei tak mi nghak turin emaw rei tak doctor nghak turin a dah thei che. Mi tu emaw i nghah a ngaih chang apiang chuan Pathian chuan Isua ang deuh deuh turin a buatsaih che tihna a ni. 

Hringnun hrim hrim leh thil thar hmachhawn hi a awlsam ngai lo, mahse a lian emaw a te emaw thlarauva nangmah tipuitlingtu tur che chu i tuar chhuah hun chuan an man hle tih i hmu chhuak ang. 

Ngaihtuah zui atan. 

• Thlarauva ṭhanlen i duh em? I chhanna chuan engtiang takin nge hringnuna harsatnate chu nangmaha Thlarau rah an chhuah leh chhuah loh a hril ang?
• Engtiangin nge Pathian chuan Isua ang turin tun hnaiah hian a buatsaih che? I nunah chuan engtin nge hna a thawh? 
• A harsa chung chung chuan Pathian chuan engtin nge i ṭawngṭaina chu Isua i an deuh deuh theih nan mal a lo sawm ṭhin? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...