Saturday, October 10, 2026

PATHIANIN ENGKIM HI THIL ṬHA ATAN A HMANG THEI

_Hun Harsa Atana Ruahmanna_

- Rick Warren 
- October 10, 2026
_"Nangnin min tihnat in tum a, mahse Pathianin thil ṭha atan a lo ruahman vek a ni. Mi tam tak nun ka chhanhim theihna turin Pathianin he dinhmunah hian min hung a lo ni."_ (Genesis 50:20, NLT)

Josefa thawnthu kha i la hria em?

A pain a duhsak bik ni a an hriat avang khan an itsik a, sal atan an hralh anih kha. Aigupta ramah hruai a ni a, kum 40 anih thleng kha chu a nunah khan thil ṭha reng a thleng lo tih theih a ni. Tlem han tarlang ila, sala chhawr a ni a, pawngsualtua puh a ni bawk a, a tih ni miah loah tan ina luhtir a ni.

Kum tam tak chu Josefa tan khan thil ṭha a thleng lo - mahse Pathianin a duhna hmunah tak a dah a ni. Aigupata ram, a hun laia khawvela thiltihthei ber ram thuneihna sang ber dawttu dinhmunah a la ding dawn tih a hria a ni. Chuvang chuan Josefa khan Aigupta leh Israel-te kha ṭam ata a chhanhim anih kha.

Ṭam ata ram pahnih a chhanhim a ni mai lo - amah sala hralhtu a chhungte ngei pawh a chhanhim. A unaute a hmaa an inlan khan Josefa khan a duh chuan a chunga an tih ang khan a ti ve thei.

Mahse Josefa khan a unaute chungah khan eng rilru nge a put le? Khakna ni lovin khawngaihna nen a en a nih kha. Pathian thlirna lian zawk leh ruahmanna a hriat avangin khatiang rilru kha a pu thei a ni. A nuna natna a tawh khirh ber pawh kha Pathianin thil ṭha atan a hmang thei tih a hre tlat.

Josefa khan a unaute hnenah khan heti hian a ti, _"Nangnin min tihnat in tum a, mahse Pathianin thil ṭha atan a lo ruahman vek a ni. Mi tam tak nun ka chhanhim theihna turin Pathianin he dinhmunah hian min hung a lo ni"_ (Genesis 50:20, NLT). Josefa unaute sualna kha Pathianin mi tam tak chhanhim nan a hmang ta thung a ni.

I chunga rilru dik lo pute, hawtu che, sawiseltu che leh tinatu che an awm reng ang. Tu emaw thil tih sual avangin tisual ve miah si lo khan i tawrh hun a awm ang. Pumpelh theih pawh a ni lo.

I hrethiam lo mai thei - mahse i hriatthiam kher a ngai lo! Josefa ang khan i hun tawn kha i tidanglam thei lo pawh a ni mai thei. I paltlang thei dawn em tih i hre lo a ni thei, emaw Pathianin engtinnge a tih dawn tih i hre lo emaw a ni thei. Mahse Pathianin a hmu a, a ngaihsak a, dik takin a ti ang tih i ring thei.

Pathianin a ruahmanna tihpuitlin nan engkim a hmang thei, a ṭha emaw a chhia emaw pawh nise. I nun ṭhan lentir a Isua ang tura a hrual zelna che kha tumahin an dal thei lo. Miin thil ṭha lo i chunga an ruahman pawh Pathianin thil ṭha atan a hmang thei.

Ngaihtuah zui atan.

A chang chuan kum tam tak hnuah chauh Pathianin kan natna te thil ṭha atana a hman kan hmu thiam chauh ṭhin. Chutiang chu i nunah hmuh tur a awm tawh em? Chung natna i paltlang aṭang chuan engnge i zir chhuah le?

Engvangin nge natna khirh takte hi Isua ang tura kan ṭhan len theihna pawimawh ber a nih?

Tinatu che kha khakna ni lova khawngaihnaa i chhan let theihna turin khawi aṭangin nge chakna i neih? Mahniin i ti thei em?

*I chhandamna turin Isua i ring tawh em?*
Bible chuan a Fapa Isua Krista kan rin chauhin vanram kan luh theih thu min hrilh. Pathian hmangaihn dawng tur emaw vanram lut tur emawin kan thawh chhuah ve a ngai lo. Bible chuan heti hian a ti, _"Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni. Thiltih avâng a ni lo ve; chuti lo chuan, miin an chhuang dah ang e."_ (Ephesi 2:8-9).

Isua ringa a hnung zui tura i la inpe lo anih chuan engah nge i nghah khaw tlai ang? Isua ringa a hnung zui tura i inpeih tawh chuan heti hian ṭawngṭai rawh le:

"Isu, ka rin phawt che chuan ka thil sual tih zawng zawngte ngaihdam a ni ang tiin min tiam a. Min siam chhan ka zir ang a, engtik niah emaw mi  bûk lovin i vanram in nuamah min hruai ang tih ka hria.

"Ka sual ka puang a, min Chhandamtu i ni tih ka ring. Ka sual ka puana nang ka rin che chuan chhandam ka nih tur thu min tiam a. Chhandamna chu thiltih vang ni lovin rinna vang a ni i tih avangin ka ring a che. Ka nuna Lal ata ka thlanga che.

"Vawiin hian ka nun zawng i tan ka hlan e. Nangin thuneihna rawn chang ang che. Ka nun i tan ka hlan a, min chhandam a, i chhungkuaa min pawm turin ka dil a che. Isua hmingin, Amen." 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...