Thursday, October 8, 2026

PATHIANIN THIL KHA THIL ṬHAA A CHANTIR DAN

_Hun Harsa Atana Ruahmanna_

By Rick Warren
October 08, 2026

“ _Tin, Pathian hmangaihtu, ama ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria_ .” [Rom 8:28]

Mi ṭhenkhatte chuan chhang ka ur “thiam” tih an hria ang (Ka chhungte chuan thiam min ti bawk). Kum eng emaw zat liam taah khan, chhung ur dan zir turin thu tlukna ka siam a. Ka chhut dan chuan ka ei duh a nih chuan a ur dan chu ka thiam tur a ni. Chhang siam nuam ka tihte chu ur harsa lehzual deuhte chu an ni nghe nghe: German chocolate cake chu a bul aṭangin ka nupui piancham lawmna atan ka ur ṭhin. 

Chhang urin thil zirtir chu cake siamna atana a bawlhlote chu anmahni mai chuan an tui hauh lo tih chu a ni. Ṭhenkhat chu an kha em em a. Chhangphut pawh chu amah maia i ei chuan an tui miah lo. Chhang dawidim emaw artui hel emaw hriak emaw te chu ei chhin ta la, i inchhir khawp ang. Vanilla pawh chu a tui lem lo. Mahse an zavai chuan uluk taka chawhpawlha ur hnu chuan ei ta la, an tui hle thung si ang. 

Bible-a thutiam ropui ber pakhat chu Rom 8: 28 chu a ni: “ _Tin, Pathian hmangaihtu, ama ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria_ ,” tiin. 

Chu Bible thu chuan thil engkim hi a ṭha a ti miah lo. Khawvel chanchin tharte hi en thuak chuan an ṭha lo deuh tlangpui zel. Chu thutiam pawh chu mi zawng zawng tana pek a ni lo – Pathian hmangaihtute tan chauh a ni. Pathian kan ṭhatna tura engkima a thawh dan chu chhang ur nen chuan a tehkhin theih ang. Pathian chuan thil kha chu thil ṭhaah a chantir thei. 

I nunah leh khawvelah, thil kha leh ṭha lo chu i lo hmachhawn fo vang. “A tui lo em mai. Chu chu ka nuna thlengah ka duh lo. Vawiin khawvela thil thleng chu ka duh hauh lo,” i lo ti mai thei. 

I nun a inthlak mawlh mawlh lai leh a inher zung zung lai chuan thil ṭhenkhatte chu an tui hauh lo vang, I nuna thil harsa lai chauhte chu thlirin i nun i tikha lovang tih intiam ang che. A chhan chu nunin awmzia a neih loh lai chuan Pathian chuan - thil kha chu thil ṭhaah a chantir thei - tih chu ring tlat la, ama tan engkim a ruahman thei tih chu hria ang che.  

Tunah chuan i hmu thei lo a nih pawhin a tuina chu vanramah engtik niah emaw i la tem ve ngei ang. 

Ngaihtuah zui atan. 

• I thil hriat chian loh i thlir chang chuan eng vangin nge i lo khak ṭhin? 
• Thil a danglam vak lai chuan engnge i lo thlir ang? Eng nge chiang takin a hmuhtir ang che chu? 
• Pathian chuan eng vangin nge Rom 8: 28 chu amah hmangaihtute leh zuitu tan a siam ni ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...