_Hun Harsa Atana Ruahmanna_
- Rick Warren
- October 7, 2026
"Lei awm chhung zawng buh tuh leh buh lak te, khaw vawt leh khaw lum te, nipui leh thlasik te, chhun leh zan te chu a bo lo vang," a ti a Genesis 8:22
Inthlak danglamna hi pumpelh theih a ni lo. Kan hre vek tho nain thil a ngai renga a awm loh chuan mak kan ti fo ṭhin.
Inthlak danglamna a lo thlenin kan phunnawi a, kan vui a, kan thinur a, mi dangte kan mawhchhiat ṭhin. Thuneihna kan nei emaw tih mai turin thil lo thleng tur chu dan kan tum ṭhin a. Mahse he leia thil reng reng hi a ngai rengin a awm ngai lo. Kan nun kawng tinrengah hian engtik lai pawhin, a ṭha zawng emaw, a chhe zawng emaw pawh ni se, inthlak danglamna a awm reng ṭhin a ni.
Pathianin lei a siam khan, a sawi hmasak ber chu hei hi a ni, "Lei awm chhung zawng buh tuh leh buh lak te, khaw vawt leh khaw lum te, nipui leh thlasik te, chhun leh zan te chu a bo lo vang," a ti a (Genesis 8:22). A duan dan famkimah chuan he khawvela thil zawng zawng hi hun bik neiin Pathianin a siam a. Kan hmuh theih loh leh kan hriat theih loh lai pawhin engkim a danglam reng a. I chhungkua kha a hma ang kha a ni tawh lo. I hna pawh kha a hma ang a ni tawh lo va. Nangmah ngei pawh kha a hma ang kha i ni tawh lo.
Inthlak danglamna hi Pathianin a duan a nih avang leh ṭha a tih avangin kan ṭhatna tur a ni tih kan hria. Inthlakna hian inthlahdah lutuk lo turin min veng a, kan hriat thiam loh thilah pawh Pathiana innghah zel dan min zirtir ṭhin. Inthlakna hian kan nunah natna a rawn thlenin, amah rinchhan turin min siam ṭhin. Inthlakna hian thlarau, taksa leh rilru lamah ṭhanlenna chu nunphung pangngai a nihzia min hriattir a. Isua nena in lendunna kawnga a ṭha zawnga danglamna i neih chuan, amah i lo ang deuh deuh tihna a ni.
Inthlakna awm lovin ṭhanlenna a awm thei lo va, chân awm lovin inthlakna a awm thei lo, lungngaihna awm lovin chânna a awm thei lova, natna awm lovin lungngaihna a awm thei lo. Ṭhan duh a, ṭha zawk nih duh si a, inthlak tura natna paltlang duh si lo chu , hmeichhe pakhatin, "Nau neih ka duh a, mahse nau vei ka duh lo," a tih ang deuh a ni. Chutiang chu a thleng ngai dawn lo! Nunna thar khawvela a lo pian chhuah theih nan natna paltlang a ngai a ni. Thil ṭha tinreng kan dawn theih nan a chang chuan inthlak danglamna na tak kan paltlang a ngai ṭhin.
Inthlakna hi a awlsam reng dawn lo va, a awmzia i hrethiam reng kher lovang.Mahse hei hi hre reng rawh: Pathianin inthlak tura a phût apiang che chu i ṭhatna tur a ni tih i chiang thei a ni.
Ngaihtuah zui atan
Eng kawngahte nge a ṭha zawnga i inthlak a, i ṭhan len?
I inthlakna turah i hriat lem loha Pathian hnena lawmthu sawi lawk hi engvangin nge a pawimawh?
Eng inthlakna nge Pathianin i nunah emaw, i hmangaih tak nunah emaw thlentir se i tih? A hnenah chu chu i dil tawh em?
[ *Lettu: Marova Punte* ]
No comments:
Post a Comment