_Ruahmanna Hman Hun_
By Rick Warren
October 29, 2026
“ _In tâna ka remruat chu keimah chauhvin ka hria,’ tih hi LALPA thu chhuak a ni. ‘Chhiatna ni lo, thil ṭha in beisei chu in chan theih nân ka ruahman a ni._ ” Jeremia 29:11
I pian hma daih tawh aṭang khan Pathian chuan a ngaihtuahnaah a lo vawng tawh che. Chuti chung chuan keimahni mimal ngaihtuahna zawk kan thlirin Pathian ruahmanna chu kan en kan fo. Kan hlimna leh lungawina turte chu Pathian aia hre zawk niten kan lo inngai hial bawk a.
Ephesi 2: 10 chuan, “ _Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni_ ,” tiin a lo sawi a. Pathian ngaihtuahna chu i nun tan nangma ngaihtuahna ai chuan a ṭha zawk fe a ni. Eng vangin nge? Nangmah leh nangmah i inhriat dan aia chiang daih khan Pathian chuan a hre che. I nun tana a ruahmanna chu i lo ruahmanna ai chuan a ropui zawk daih bawk. Thil zawng zawng i hre vek thei lo, thlirna dik ber pawh i nei reng hek lo – mahse Pathian chuan a nei thung.
I nun tana Pathian ruahmanna chu nangmah siam chhan i nihna tak nena in mil chiah an ni – chuvang tak chuan i ruahmanna ai chuan Pathian ruahmanna chu an pawimawh zawk fe ta reng a ni.
Pathian chuan i rilrua awm zawng zawng chu neihtir che a tum hauh lo. I duhthlanna zui chuan kal ta la, “rawngbawlna lam” chu i hawi kher lo palh thei. Ka tet laia ka duhthusam ang vel kha i duhthusam pawh a lo ni palh thei: zaithiam lar nih a ni daih! Vanneihthlak takin chu chu Pathian ruahmanna a ni lo; chung aia ṭha zawk chu ruahmanna a lo nei.
“ _In tâna ka remruat chu keimah chauhvin ka hria,’ tih hi LALPA thu chhuak a ni. ‘Chhiatna ni lo, thil ṭha in beisei chu in chan theih nân ka ruahman a ni_ .” Jeremia 29:11
Ruahmanna ṭha tawk lo lo neiin buaina i lo tawk tawh a ni thei. Tu emaw chu nei tur angin i lo inngai tawh a ni thei bawk. Mahse chu chu i han enlet a, ṭha hauh lo turte a lo ni tlat. I thil tum leh ruahmanna ṭhenkhatte chu hnuchhawn daih an ṭha ang, chu chu i tana ṭha hauh lote an lo ni. Tunah chuan i han en let a, Pathian ruahmanna ṭha zawk chu a lo inṭan mek a ni.
Nangma ruahmanna leh Pathian kawng ruat chu khaikhin chang i lo nei a nih chuan Pathian ruahmanna zawk chu thlang tlat ṭhin ang che. I tana Pathian ruahmanna zawk chu an ṭha zel ang. An tina ngai lovang che a. Beiseina ropui tak pe chein hmabak duhawm tak an chhawp chhuahsak ang che!
Ngaihtuah zui atan.
• I nun tana ruahmanna i lo siam ve tawhte chu duhthlanna dik lo an lo ni tawh nge tawh lo tih han chhut teh. Chu chuan Pathian rinchhan chungchang chu engtin nge an zirtir che?
• Pathianin i tana ruahmanna a siamsak che chu engnge ni? Engtiangin nge chung ruahmanna chu a hriattir che?
• I ruahmanna Pathian kuta hlan tih chu engnge a awmzia?
Pathian hnena ruahmanna hlan tih chu engnge a awmzia?
Isua ring tura thutlukna i la siam lo a nih chuan engah nge ni dang i la nghah kher ang?
He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment