Saturday, October 24, 2026

PATHIAN HRIAA AMAH HMANGAIH TURA DUAN I NI

_Hei hi Keimahni kan ni_

- Rick Warren 
- October 24, 2026
_"Nangin engkim i siam a, i duh avanga awm leh siam an ni si a."_ (Thupuan 4:11)

I nun chhan hmasa ber chu Pathian hriat leh amah hmangaih hi a ni. Pathianin a hmangaih nasatzia che i hriat chian poh leh amah i hmangaihna a zual sauh ang. A duh avanga a siam che i ni a. A hmangaih i nih duh lo ta se a siam miah lovang che.

Bible chuan heti hian a ti, _"Nangin engkim i siam a, i duh avanga awm leh siam an ni si a."_ (Thupuan 4:11)

Thudik chu, Pathianin i nihna anga i awm mai kha hmuh che nuam a ti. Thil sual i tih laiin ka ti lo, mahse ti tura a duan che anga i tih kha a ni ka tih ni. Chuvang chuan Pathianin thil siam tura a tih che anga thil dahna tur emaw huan i siam emaw khan thlir che nuam a ti. Thil zuar mi ni tura a duan lai che a thil i hralh ṭhat viau chuan, "Hei hi ka nau a ni" a ti ṭhin che. Rimawi i tum emaw lirthei lamah i thawk emaw a ni thei, Pathianin i nihna anga i awm khan hmuhnawm a ti che, a chhan chu a siam che a, a hmangaih che a ni.

Isuan heti hian a ti, _"Tin, ani chuan a hnênah, ‘Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,’ tih hi. Chu chu thupêk ropui leh pawimawh ber a ni"_ (Matthaia 22:37-38). He chang hian chibai buk awmzia a sawifiah. Chibai buk tih hi awlsam taka kan hrilhfiah dawn chuan Pathian inhmangaihtir a, Pathian hmangaih let ve hi a ni.

Chibai buk hi rimawi mai aia thuk a ni. Ngawi rengin emaw, thilpekin emaw, ngaihthlak leh midangte rawngbawlsak hmangin emaw Pathian chibai i buk thei. Pathian hmaah amah i hmangaihna i lantir rualin kawng tam takin chibai i buk thei.

Chibai buk tih ep chiah chu lungkham neih hi a ni a, chibai buk i bansan tih lantirna a ni bawk. Nitin duhthlan theihna ni nei: "Lungkham tak thil ka nei dawn nge chibai ka buk dawn?" tiin.

Matthaia 6:32-ah chuan heti hian kan hmu, _"Chung thil avang chuan Pathian hre lote chu an mangan ṭhin."_ (CEV). Engvangin? A chhan chu Pathian ropuizia leh a hmangaihna an thlir ṭhin loh vang a ni; an harsatna leh muan lohna an thlir hmasa zawk ṭhin.

Pathianin a siam chhan che anga amah hriat leh hmangaih i duh chuan heti hian bul ṭan rawh. Zingtin heti hian ṭawngṭai la, "Lalpa, nangmah hmangaih tur chein min siam tih ka hria a. Ka lawm e. Kei pawhin ka hmangaih che. Vawiin hian engmah ka thawk zo lo anih chuan hriat chian leh zual che a, hmangaih leh zual che ka duh, chu chu ka dam chhan ber a ni si."

Ngaihtuah zui atan.

Eng tih nge nuam i tih? I duhzawng tak thil i ti lai kha Pathianin hmuhnawm takin a thlir che tih hi mak i ti em?

Pathianin a hmangaihna che lo dawnsawn hi harsa i ti em? Engvangin?

Vawiin hian eng emaw i lungkham a ni mai thei. Chu i lungkham thil chu chibai buknaa i thlak khan engnge ni ang le?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...