Friday, October 23, 2026

ENG VANGIN NGE HETAH KAN AWM?

_Hei Hi Keimahni Kan Ni_

By Rick Warren
October 23, 2026
“ _Ama duh zâwnga remruat ang zêla thil engkim titu tum anga ruat lâwk ni tawhin, amahah bawk chuan a ro tûra siam kan ni, keini Krista lo beisei hmasa tawhte hi a ropui fakna kan lo nihna tûrin_ .” Ephesians 1:11-12

I dam chhan awmzia hre tak tak tur chuan Pathian nena bul inṭan leh a ngai ang. Amah chauh chu thil nihna tak tak hrilh theitu che chu a ni. 

Thil siam eng emaw i la hmuh ngai miah loh chu lek chhuakin a ṭangkaina tih chu zawt ta che ila rin thu baka mi chhan ngaihna i hre kher lo vang. A siamtu nena in inbia emaw a hman dan ziahna bu emaw i chhiar a nih loh chuan a awmzia tak tak i hre ngai lo vang. 

Chutiang chiah chu thlarau nunah pawh a ni ve chiah. Nangmah Siamtu Pathian nen insawi dun emaw, a siam chhan che inziahna bu Bible chu i chhiar a nih zet loh chuan i nun awmzia chu i hre ngai lo vang. 

I dam chhan chu rin dan eng emaw i lo nei thei ang a. Chu chu philosophy-in a sawi dan chu a ni: “Chu chu niin ka hria; kha kha ka dam chhan chu niin ka hria,” i lo ti thei ang. 

In khawtlang nun, nangmah leh nangmah in en mai tura hrilhtu che chu thlirin nangmah lam ringawt i in en thei. Ṭum khat chu chutiang chuan ka lo ti tawh a, ka hmuh chhuah chu buaina mai an ni. Chumai bakah chuan, i dam chhan hmu chhuak mai theia inngaihna chu thil atthlak a ni zawk daih, a chhan chu nangmah leh nangmah i insiam lo! Nangmah siamtu Pathian chauh chuan a siam chhan che a hre thei. 

Bible chuan, “ _Ama duh zâwnga remruat ang zêla thil engkim titu tum anga ruat lâwk ni tawhin, amahah bawk chuan a ro tûra siam kan ni, keini Krista lo beisei hmasa tawhte hi a ropui fakna kan lo nihna turin_ ,” tiin a sawi [Ephesi 1: 11-12]. 

Tichuan, mihring nun hi engnge lo ni ta ber? Bible chuan hei hi a inbuatsaihna mai chauh niin a sawi – lemchan tak tak hmaa inbuatsaihna ang chauhin. Hei hi vanram a la ni lo. Chuvang chuan hrehawmna, natna leh lungngaihna tam tak a awm. Lei hi hmun famkim a ni lo.  

Mahse Pathian thung chuan i nun tan thil thui tak a lo thlir lawk a, Isua chu helam aṭang hian i lo thlan lawk ngaiin chu chuan i chatuan hun a la hril ang: Pathian nen a ni thei a, amah tel lovin a ni thei bawk. Amah chu i nun atan i duh em, i nun atan i duh lo em? I duhthlanna tur a ni.  

Pathian chuan chhan panga neiin a siam che: amah hriaa hmangaih turin, midang hmangaih turin, thlarauva ṭhang lian turin, amah chu midang kaltlanga rawngbawlsak turin, a chanchin midang hrilh turin. 

Tun aṭanga ni hnih chhung chu kan dam chhan hmasa ber leh a tawp ber kan zir ho ang – Pathian hriat leh midangin an hriat theihna tura tanpui chu. I nun bul inṭanna chu nangmah siamtu Pathian hriat chu a ni a, i rawngbawlna chu a hmangaihna midang hnena hrilh chu a ni a. Chutiang hriat chianna nun nen chuan chatuan hun atan a buatsaih thei ang che. 

Ngaihtuah zui atan. 

• I dam chhan Pathianah chauh hmuh chu eng vangin nge a pawimawh em em? 
• Mi tam tak chuan khawvel finna emaw anmahni emaw in thlirin an nun awmzia an dap ṭhin. Hmun dang chutianga miten an dapna chu eng thilah te nge ni? Chung thil, Pathian bakah chuan, khawi lai nge en tura thlem i lo nih ve tawh?
• Pathian buatsaih nun awmzia ziahna – Bible – chuan i nun awmzia eng angin nge a kawhhmuh che?  

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...