Friday, October 16, 2026

MI ZAWNG ZAWNG TIHLAWM TUM SUH

_Hun Harsa Atana Ruahmanna_

By Rick Warren
October 16, 2026
“ _Keima duhzâwng tih tum lova, mi tîrtu duhzâwng chauh tih ka tum zâwk avângin_ .” John 5:30

I zing thawh hma chhan chu eng vang nge? Hna thawk turin? Rim taka lehkha zir turin? Mite rawngbawlsak a, hmangaih turin em ni? Hun harsa kara hmalam pan turin? 

Rilru hah reng renga hun hman i duh loh chuan i thil tih chhan ber kha i hriat a ngai. 

Eng vangin? I thil tihchhan i chian loh chuan kil hrang hrang aṭangin pawttu i nei ang. Isua chuan, “ _Chhiahhlawh tu mahin hotu pahnih rawng an bâwl kawp thei lo_ ,” tiin a sawi mai [Luka 16: 13]. 

Pathian pawhin mi zawng zawng a tilawm thei lo. Mi ṭhenkhatte ruah dila an ṭawngṭai laiin ṭhenkhat thung chuan ni êng duhin an lo dil ve bawk a. Kum 40 chuang pastor hna ka lo thawh tawh aṭang khan mi eng emaw zat chu ka tilawm lo ṭhin tih ka hria, a chhan chu mite chu beisei inang lo tak tak an neih vang a ni. Mi zawng zawng ka tilawm thei lo, nang pawhin a ni ngei ang. 

Bible chuan mihring hlauh chu thang ang a ni tiin a sawi. I rilru leh thinlung chu a man che ang a, i inchhuih zui ang. Chuvang tak chuan Johana 5: 30 ah chuan, “ _Keima duhzâwng tih tum lova, mi tîrtu duhzâwng chauh tih ka tum zâwk avângin,_ ” tiin a sawi. Isua khan mi a tihlâwm tur chu a hria. 

Pathian tihlâwm i tum lo a nih chuan, lang thei mai chu, midang tute emaw tihlâwm tumin i bei dawn tih a chiang reng mai. Pathian tihlâwm tum chu midang tihlâwm tum ai chuan a awlsam fe zawk – a chhan chu amah tihlâwm theihna kawng chu thil dik a ni zel ang. Chuvang chuan Isua pawh kha buaina karah a hahdam tlat ṭhin. Mi pakhat chauh tihlâwm a tum vang khan. 

I hlim theihna tur chuan tu thu leh hlaah nge i lo innghah ṭhin? Tu nge tihlâwm i lo tum ve? Mi ṭhenkhat tan chuan, nu leh pa aṭanga lawmna emaw fakna emaw dawn tum reng rengin a ni thei a. Ṭhenkhat thung chuan, hotu tihlâwm har zet tihlâwm tumin an bei thung. 

Mahse tuartu ringawt chu i ni lo. I duhthlanna chenah chiah khan mi zalên i ni ang. Mi tute mahin an beiseina tihlawhtling turin i remtihna tel lo chuan an nawr lui thei lo ang che. 

Mi pakhat tihlâwm tuma i bei a nih chuan hnawl hlauhna thlarau chuan a thunung tawh lovang che. Hmangaihna chuan a thunun zawk che ang a, Pathianin a siam chhan che ni tur chuan i lo zalên tawh zawk ang. 

Ngaihtuah zui atan. 

• Engtin nge midang ni lova Pathian chauh chauh tihlâwm tumna chuan rilru leh ngaihtuahna zalen zawk a pek theih ang che? 
• Midang tihlâwm tumna chuan engtin nge buaina a lo thleng tawh che? 
• Pathian lawm zawng chu engtin nge i lo hriat theih ang? 
*[Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...