Thursday, June 11, 2026

ZAIDAMNAIN INNGHIRNGHONA A TIBO

_Malsawmna Nih Theihna Kawng_

By Rick Warren
June 11, 2026
“Chhânna nêmin thinur a tikiang ṭhîn a.” [Thufingte 15: 1] 

Kan kiang hnaia mite lawmna emaw thinrimna emaw chu kan lo entawn fo ṭhin tih i ngaihtuah ngai em, a bik takin, inep chiah emaw inhmachhawn zawnga in awm chang chuan? Chutianga kan chet chhan chu kan thluaka timur pakhat chuan darthlalang ang deuhin chutiang thil che vel chu a lo entawn ve vang a ni. 

Entirnan, mi tute emaw i laka an thinrim chuan i thinrim ve ang. Tu emaw lungawi lo zet bula hun eng emaw chen i hman tawh chuan lungawi lohna eng emaw i lo nei ve leh mai ang. 

Chutiang chiah chuan tuten emaw aw-ki sang ang reng taka an hrawk che chuan i hrawk let ve mai ang. Tichuan an awki an san lehzual ang. Nang pawhin i aw-ki i san lehzual ang. Tichuan rei loteah boruak a sosang chiam tawh ang a, i thinrimna chu thunun hleihtheih pawh a ni tawh lo vang. 

Bible chuan midangte nena inhmachhawn dan kawng dang daih a sawi thung: “Chhânna nêmin thinur a tikiang ṭhîn a,” tiin [Thufingte 15: 1].  

In nupa nun, fate enkawlna, ṭhian kawmna leh hnathawhna atana thil pawimawh harsatna leh innghirnghona tam tak pumpelh theihna thurawn kan lo pe teh ang che: Miten an awki an san chang chuan i awki tihniam ang che. Chutianga i ti thei a nih chuan i chakna chu i thuhnuaiah i dah tihna a ni. 

Chakna thununna hnuaia awm tih sawina ṭawngkam dang chu zaidamna [gentleness] a ni. Zaidamna chuan innghirnghona a tireh. Thinrimna sosang tur a thunun. Mi zaidam chuan a chakna chu a thununna hnuaiah a dah tihna a ni. 

Bible-a “zaidamna” tih Grik ṭawnga an hman chu prautes tih a ni a. Tunhmaa lehlin chuan chu thumal chu “meek” tih an hmang, kimki emaw tlawm tihna a ni. Chu thumal chu tunlai khawvelah chuan hman a ni tawh chiah lo a ni awm e, a chhan chu chak lohna nena huang khata dah an nih fo vang a ni. Mahse zaidamna – prautes chu chak lo tihna erawh a ni lo thung. 

Dik tak chuan, prautes tih thumal chu ram sakawr chak tak mahse thunun tawh si tihna a ni. Chutiang chu han mitthla chhin teh. Ramngaw khawi laiah emaw kal ta la, ram sakawr la kam la vuah loh hlauhawm tak chu i hmu a, a chak hlein mihring pawh a tihlum thei hial ang. Mahse chu sakawr chu i thunun tawh chuan i duh dan danin i kuai her thei tawh ang. Chu a chakna chu a pu tan chuan remchang taka hman theihin a lo awm ta tihna a ni. 

Pathian mi i nihna zawna zaidamna awmzia chu i zir chhuak a nih chuan i chak lo ta tihna a ni mai lo. I chakna chu Pathianin a thunun ta a, a hman theih turin a infawkkhawm ta tihna a ni zawk. 

Ngaihtuah zui atan. 

• I fate an awm ṭhat duh loh chang emaw i kawppui emaw ṭhian hnai vai te nena in inbakkaih chang emaw, miten awki sang taka an hauh chang che chuan engtiangin nge i lo hmachhawn? 
• Eng vangin nge zaidamna nena midang hmachhawn chu a a muanawm zawk ṭhin? Eng vangin nge miten chu chu an ngaihven? 
• Zaidam taka nun chu tun karah hian zir tum chhin teh. Zawldawh taka mi i dawr chuan mite chuan engtin nge an lo dawnsawn ṭhin che?  

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...