_Malsawmna Nih Theihna Kawng_
By Rick Warren
June 12, 2026
“Dawhtheihnain rorêltu thlêm thlûkin a awm a, Thu nêm chuan ruhte a titliak ṭhîn.” [Thufingte 25:15]
Zawldawhna chuan mite a hneh hma bik.
Sumdawnna kawngah i hlawhtling viau a nih chuan chu mi awmzia chu i lo hre tawh ang! A chang chuan thil hralh chu a harsa viau thei – fakna [advertisement] uar taka kalpui pawh chuan kori a tu tehchiam lo thei. Mahse tunlai hunah chuan zawldawh taka mi dawr chuan awmze thui tak a nei. Mi ṭhenkhatten thil an lei chhan chu an mi rin zawng takte aṭanga thil eng emaw sawi mawina an hriat vang a ni. Ṭhian rinawm emaw sumdawng zawldawh taka mite dawrtu aw-ka chu fakna [advertisement] ri bung bung aiin a thawk na zawk thei.
Chutiang chu sumdawnna huangah chauh a dik lo; hringnun pumpuiah a dik vel vek a ni.
Bible chuan chu thu chu vawi eng emawzat a sawi nawn hial. Thufingte 25: 15 chuan hetiang hian a sawi, “Dawhtheihnain rorêltu thlêm thlûkin a awm a, Thu nêm chuan ruhte a titliak ṭhîn.” I chhungte emaw thawhpui emaw an pawm hreh deuh thilah chuan hneh [convince] i lo tum tawh em? Vaukhanna ni lovin, zawldawhna chuan anmahni a hneh thei.
Ka rawngbawlnaah ngei pawh mi zawng zawng chu Isua tana an nun hlan tura hneh ka tum ṭhin a, mahse zawldawh taka ka tih a ngai. Mipui hmaa dingin ka hrawk chiam chiam chuan ka thu an ngaithla lo thuai ang. Mahse zawldawh taka mi dawr chuan mi a hneh hma bik.
Thufingte 25: 15 hi hetiang hian a lehlin theih bawk ang: “Tawngkam nem chuan mi luhlul tak pawh a hneh thei” tiin. Chu chuan i tan engnge awmzia a neih? Nu/pa emaw zirtirtu emaw i ni thei a, fate hrawk chuan awmzia a nei lo tih i hre chiang khawp ang. Thinrimna leh beidawnna chuan hlauhna, huatna, inkiltawihna chauh a thlen. Zawldawh taka hmangaihna chuan mi a siamṭha ṭhin.
Bible chang ngai tho kha hetiang hian a lehlin theih ang: “Dawhthei tak leh zaidam taka thusawi chuan roreltu a hminin harsatna eng pawh a chingfel thei” tiin [Thufingte 25: 15]. Mi tam berte chu “roreltute” rorelna khawvelah kan cheng tawh lem lo, mahse kan chunga awm – boss, supervisor leh thuneitu tu emaw chu kan nunah an awm zel. He Bible chang hian zawldawhna nen chuan kan chunga thuneitu pawh kan hmin thei ang tih min hrilh.
Bible chuan Thufingte 16: 21 ah chuan, “Rilrua fing chu mi remhria tih an ni ang a, Ṭawngkam thlumna chuan thiamna a tipung,” tiin a sawi.
Chu changa thumal pahnih “thlumna” leh “thiamna” [persuasive] chu tha taka zawmtu a awm. Mite hneh thei tur chuan i nelawm [pleasant] hmasak a ngai.
Dawhtheihna/nelawmna [pleasant] chu puitlinna tarlangtu a ni. Mi ate chu an sualin khawsakpui an hrehawm ṭhin. I lo fin deuh deuh a, i lo puitlin deuh deuh ang zelin i thusawi chu a lo hriselin [positive-in] a lo dam deuh deuh ang.
Hei hi hria la: Tute pawh i nawr pang pang ringawt chuan i hneh thei ngai lo vang. Zawldawh tak chauhin mite i hneh thei ang.
Ngaihtuah zui atan.
• Mite i dawr chang chuan zawldawh taka dawr lovin i lo chungtlak tawh ṭhin em? Eng nge a rah chhuak?
• Tute zawldawhna emaw chuan an lo hmin ve tawh ṭhin che em?
• Tute nge zawldawh taka nung ṭhin nia i lo hriat ve? An nun aṭang chuan engnge i lo entawn ve ṭhin?
[ *Lettu:* Peka]
No comments:
Post a Comment