_Malsawmna Nih Theihna Kawng_
- Rick Warren
- June 10, 2026
_"Pathian hmangaihtu, ama ruat anga a kohvate tan chuan, an thatna turin engkimin a thawhsak hlawm thin tih kan hria," Rom 8:28._
Lusûnna, chânna leh natnate hi nuna pumpelh theih a ni lo. Mahse heng thilte hi i ṭhanlen nan Pathianin a hmang thei tih i hria em? Kawng thumin a ti ṭhin:
*Pakhatna, Pathianin i ngaihtuahna lak pen nan natna a hmang ṭhin.* CS Lewis chuan, "Kan hlim lai chuan Pathianin zawi tein min bia a, kan chhia leh ṭha hriatnaah erawh chuan ṭawng pangngaiin min bia a, mahse kan natnaah chuan a au vak ṭhin," a ti. Natna hi Pathian aurinna hmanrua a ni. Êng kan hmuh ringawt chuan kan inthlâk ngai mang lo. Meisa kan deh hunah chauh kan inthlak ṭhin.
Thufingte 20:30 chuan, "Pem khawpa vuakna chuan thil ṭha lo a tlêngfai," a ti.
*Pahnihna, Pathianin thil chhia aṭangin thil ṭha a siam chhuak ṭhin.* Biable chang lar tak pakhat Rom 8:28 chuan, "Pathian hmangaihtu, ama ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria," a ti.
Thil i chân hian i nungchang a ṭhanlen theihna tura hun remchang a ni. I natna i thunun thei lova, mahse chu natna chuan a ti khà nge a ti ṭha zawk dawn che tih erawh chu i duhthlanna a ni. Hmasawnna rahkâ atan i hmang dawn nge dâltu atan i hmang tih erawh chu i kutah a awm. Hei hi hre reng rawh, i natna karah pawh Pathian chuan i ṭhatna turin hna a thawk reng a ni.
*Pathumna, Pathianin chatuan atan a buatsaih che.* Bible chuan 2 Korinth 4:17-18-ah chuan heti hian a sawi, "Kan hrehawm nêp tak, tun mit khap kar chhung chauhva awm tur hian, ropuina nasa tak chatuan atan min siamsak nasa tulh tulh a ni. Thil hmuh theihte hi en lovin, thil hmuh theih lohte chu kan en zawk si a, thil hmuh theihte hi rei lo te atan a ni a, thil hmuh theih lohte erawh chu chatuan atan a ni si a."
I car kha vanah i keng dawn lova, i tlereuh leh i thawmhnaw kha vanah i keng dawn lo, i hna leh eizawnna pawh kha vanah i keng dawn lo. Mahse i mizia/nungchang erawh chu i keng dawn a. Nangmah ngei kha i keng dawn a ni.
Pathian chuan i nawmsakna aiin i nungchang ṭhan lenna kha a ngaihtuah zawk. Eng vangin? A chhan chu van i thlen hunah chuan nawmsakna hun i la ngah dawn a ni. Mahse he khawvel hi chu inpuahchahna hun a ni a, zirna hun emaw, intih lumna (warm-up) hun chauh a la ni. He leia i harsatnate hmangin Pathian chuan chatuan ropuina atana lo inpeihtir che a tum a ni. Chu chu thlamuanna a ni.
I nat laiin, "Pathianin eng nge a tih mek?" tih zawh tur a ni. I ngaihtuahna lâk pên a tum em ni? Thil ṭha lo aṭangin thil ṭha siam chhuah a tum zawk em ni? Nge ni a van aṭangin i nungchang a buatsaih mek zawk?
Engkimah amah chu i ring thei a ni.
Ngaihtuah zui atan
Pathianin i ṭhatna turin a thawk tih hi
eng nge a awmzia? Ringtute chungah chauh Pathianin thil ṭha a thlentir tihna em ni?
Eng vangin nge van lam thutiam aiin vawiina ka thil tawn hi ngaithuah a awl zawk ṭhin?
I nat huna Pathian aw i hriat theih nan tunah hian engtin nge i inbuatsaih lawk ang?
[ *Lettu: Marova Punte* ]
No comments:
Post a Comment