_Malsawmna Nih Theihna Kawng_
By Rick Warren
June 18, 2026
“I chhiahhlawh Mosia hnêna, ‘In bawhchhiat chuan hnam tin zîngah ka tiṭaiṭâm ang che u a; amaherawhchu, ka lam in lo hawi leha, ka thupêkte in pawma in zawm chuan, in zînga mi vân tâwp thleng pawha hnawh chhuah awm mah sela, chûng ata pawh chu ka kai khâwm leh ang a, ka hming ka awmtîrna tûra ka ruat hmunah chuan ka hruai leh ang,’ tia thu i pêk kha khawngaih takin hre reng ang che.” [Nehemia 1:8-9]
I ṭawngṭaina chuan Pathian lam hawitir chein i buaina zawng zawng ai chuan amah chu a lian zawk a ni tih a hriattir che. Pathianin i ṭawngṭaina a chhang lai i hmuh chuan i rinna chu tihfiah lehzualin a awm ṭhin.
Vawiin hian Nehemia nun behchhanin hlawk taka ṭawngṭai dan kan zirho dawn a ni:
1. *I dilna chu Pathian mizia nen inmil rawh se.* Pathianin a chhan duhzawng tur che chu dil ang che. Hetiang hian i sawi thei ang, “Lalpa, he ṭawngṭaina hi i mize laimu nen an inmil avangin chhang turin ka duh che. Nang chu Pathian rinawm i ni a. Pathian ropui tak i ni bawk. Hmangaihtu Pathian i niin Pathian mak tak i ni bawk. He buaina hi min chinfelsak thei a ni” tiin.
2. *I sualna i hriat theihte avang chuan thupha chawi rawh.* Nehemia chuan chu chiah chu a ti a nih kha. “Israela thlahte sualna, i chunga kan sualna thupha ka chawi chhûng hian i beng lo chhiin i mit lo meng la, i chhiahhlawh ṭawngṭaina, i hnêna a chhûn a zâna i chhiahhlawh Israela thlahte ka ngensakna hi lo ngaithla teh ang che; kei leh ka pa chhûngte chu kan lo sual ta si a. I chungah ṭha lo takin thil kan lo ti ta a, i chhiahhlawh Mosia hnêna i pêk, thupêkte, dânte, rorêlte chu kan lo zâwm ta lo va,” tiin [Nehemia 1: 6-7]. Israel fate an hmelmaten sala an hruai thuah khan Nehemia khan thiam lohna a nei lo. A pian pawh a la piang lo; Sala hruai an nih laia piang awm tak kha a ni. Mahse mite sualnaah khan amah leh amah a intelh ve a ni. “He buainaah hian ka tel ve a ni” a ti mai a nih kha.
3. *Pathian thutiam hauh rawh.* Nehemia chu Lalpa hnenah ṭawngṭaiin, “Mosia hnena i thutiam kha hre hram ang che a ti a nih kha [Nehemia 1: 8]. Pathian hmaah chuan thil hriat reng thu i lo sawi ve tawh em? Nehemia chuan Pathianin Israel fate hnena a thutiam chu a hriat nawntir a nih kha. Chuvang chuan Nehemia chuan, “Lalpa, Mosia kaltlang khan kan rinawm loh chuan kan ram hi kan chan dawn tih min hrilh a. Mahse kan sim chuan min let leh dawn a ni tih min tiam bawk,” tiin a sawi.
Pathian chuan kan hrilh nawn a mamawh em? Aih. A thutiamte chu a theihnghilh em? Aih. Chuti a nih chuan engvangin nge Pathian chu a thutiam chu i hrilh nawn a ngaih ang? A chhan chu nangmah zawk kha Pathian thutiam chu i inhrilh nawn a ngai a ni.
4. Thil dil bik chiang tak nei rawh. Ṭawngṭaina chhanna bik dawn i duh chuan dilna mumal tak siam ang che. I dilna chu tlanglawn taka i kalpui dawn a nih chuan i ṭawngṭaina chu a chhang a ni tih engtin nge i hriat theih ang?
I ṭawngṭai chang chuan Pathian thuneihna leh rorelna hnuaiah chuan i intulut a, i nun pumpuiah chuan hna a thawkin a che velin i mamawh zawng zawng a pe thei che tih i pawmpui a ni. Chutihrual chuan ṭawngṭaina chuan Pathian nen inremin a siam che a, a hnathawh dan leh awm dan chu hre thiam turin a ṭanpui bawk che.
Hei hi ringhlel ngai suh: Pathianin i ṭawngṭaina a chhang tih chu.
Ngaihtuah zui atan.
• Pathianin i ṭawngṭaina a la chhan mai loh chu engnge ni?
• Chu thil chu dil ṭha leh la, khing thurawn pathumte khi zui ang che. Khing rahbi pathumte khian engtin nge i ṭawngṭaina an tihdanglam?
• Eng Pathian thutiam nge i hauh ngai ang?
[ *Lettu:* Peka]
No comments:
Post a Comment