_Malsawmna Nih Theihna Kawng_
- Rick Warren
- June 17, 2026
_"Ka nu pum ata saruakin ka lo chhuak a, saruak vekin ka kir leh dawn a nih hi. Lalpan a pe a, Lalpan a la leh ta a, Lalpa hming chu fakin awm rawh se," a ti a, Joba 1:21._
Kristian naupang i nih laiin, Pathianin i hriat theihna turin rilru lam thlamuanna a pe ṭhin che a, mahni hmasialna a khat naupang chhe ṭawngṭaina pawh, a awm ngei a ni tih i hriat theih nan a chhânsak fo ṭhin che a ni. Mahse rinna a i lo puitlin hnu chuan a la hrang ta che a ni.
Khawi kipa awm Pathian leh a awmna hmuna rawn inlâr hi thil dang daih a ni. Pakhat chu thudik a ni a, a dang chu inhriatna a ni fo. Pathian chu khawi kipah a awm tih hi thudik a ni a, i hriat loh lai pawhin a awm reng ṭhin. A awm ni a i hriat loh lai pawhin Pathian chu i kiangah a awm tih hi i ring thei ang. A awmna chu a thûk em avangin hriatna maia teh chi a ni lo.
Ni e, Pathian chuan a awm tih i hriat chu a duh alawm mahse chu ai chuan a amah i rin hi a ngaipawimawh zawk. Kan hmuh theih emaw, kan hriat theih emaw vang lam ni lovin, rinnain kan nung a ni.
I rinna fiahna ber chu i nun a kehchhiat vek a, khawiahmah Pathian hmuh tur a awm miah loh hunah a ni ṭhin. Chu chu Joba chungah pawh a thleng a ni. Ni khat thil thuah a neih zawng zawng a chân vek - a chhungte, a sumdawnna, a hriselna leh a thil neih zawng zawng. Tichuan, Thuthlung Hlui bung 37 chhungah hian Pathian chuan engmah a sawi lo!
I nuna thil thleng i hriatthiam loh a, Pathian a ngawih tlat laiin engtin nge Pathian i fak? Inbiakna awm miah lova i mangan em em laiin engtin nge amah nen in inzawm reng theih ang? I mittui a luan zawih zawih laiin engtin nge Isua lam i en reng theih ang? Joba tih ang khan ti ve rawh, "Tichuan, Joba chu a tho va, a puan a pawt thler a, a lu a ziat kawlh a, leiah a tlu a, Pathian a bia a, 'Ka nu pum ata saruakin ka lo chhuak a, saruak vekin ka kir leh dawn a nih hi. Lalpan a pe a, Lalpan a la leh ta a, Lalpa hming chu fakin awm rawh se,' " a ti.
I rilru put hmang dik tak kha Pathian hrilh rawh. I thinlung zawng zawng chu a hnenah leihbaw vek la. I hriatna tinreng, i lungngaihna leh i thinrimna zawng zawng pawh hlân vek rawh. Joba chuan heti hian a ti, "Chuvang chuan ka kâ ka sûm lovang, thinlung lunghnûrin ka sawi dawn e, rilru na ngawih ngawihin ka phunnawi dawn e," tiin Joba 7:11.
Pathian chu hla taka awm ni a a hriat laiin, Joba chu a au chhuak a, "Aw, ka vanglai nite kha lo kir leh thei se, ka ina Pathian pawlna ka chanlai nite kha aw, " Joba 29:4.
Vawiinah hian Pathian a awm tih i hre thei emaw, thei lo emaw i kiangah a awm reng tih i ring thei. Rinhlelhna, thinrimna, hlauhna, lungngaihna, buaina, zawhna hlirin i khat em? A vaiin Pathian hnenah hlân vek rawh. Ani chu i kiangah a awm a, i tân a awm a, i zawhna zawng zawng leh i manganna zawng zawng pawh a chingfel vek thei a ni.
Bible chuan heti hian a sawi, "Pathian kan lama a ṭan chuan tuin nge min do thei ang?" (Rom 8:31).
Ngaihtuah zui atan
Pathian a awm lo ni a i hriat hunlai kha han ngaihtuah teh. Chutiang hunah chuan engtin nge amah nen in inzawm theih ang?
Eng vangin nge Pathianin i hriatna aiin, i rinna a ngaihpawimawh zawk?
Harsatna i tawh laiin tu hnenah nge i kal ṭhin? Chumi hnena i sawi ṭhin, Pathian hnena sawi ve ngai si kha eng nge ni?
[ *Lettu: Marova Punte* ]
No comments:
Post a Comment