_Malsawmna Nih Theihna Kawng_
By Rick Warren
June 19, 2026
“I kâin Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandam i ni ang. Thinlunga ring chu thiam chantîr an ni a, kâa ṭan chu chhandam an ni bawk a.” [Rom 10:9-10]
Bible chuan Rom 1: 17 ah chuan, “Hetah hian rinna avâng chauhva Pathianin mi thiam a chantîr dân a lo lang ta a ni, “Rinna avânga thiam chang chu a nung ang,” tih kan hmu.
Pathian chuan engtin nge amah nen inremin a siam che? Isua kaltlangin. He hi chu thu awmzia hrilhfiahna chu a ni:
Nangmah leh nangmah chu i intifel thei lo.
Vanram chu hmun famkim a ni. Sualna, lungngaihna, thinrimna, sual leh thil dik lo a awm ve tawh lo. Mahse hei hi thil pawi tak chu a ni: Mihringte chu mi famkim lo kan ni a, Pathian chuan mi sual chu vanramah a luhtir ngawt thei lo, a chhan chu vanram meuh pawh chu sualin a khat ve palh ang.
Rom 3: 20 chuan, “Chutichuan, Dân thiltih avângin mi tu mah a mit hmuhin thiam changin an awm lo vang; Dân avângin sual hriat famkimna a lo awm a ni si a,” tiin a sawi.
Pathian dan zawm theia inngaite chu chu Pathian dan hre chiang lo tute chauh chu an ni ang – a chhan chu Pathian dan chu a famkim a, keini erawh kan famkim hauh si lo. Keimahni leh keimahni mai chuan kan dik thei tawh lo, Pathian chuan min chhanchhuak tur leh amah nena inlaichinna nei leh turin ruahmanna a siam ta a ni.
Pathian chuan amah nena inlaichinna dik in neih leh theih nan i sual man batte chu a pe ta che a ni.
Mihring dan i bawhchhiat chang pawhin i tuar ngei a ngai a. Pathian dan i bawhchhia a ni pawhin, Pathian hremna i tuar a ngai ang, chu chu chatuana hremna a ni. Midang, nangmah leh Pathian chunga i thil tihsual zawng zawng man chu tu emaw chuan an pek a ngai a ni. Tichuan Pathian chuan chhanchhuahna hna thawk turin Isua chu a tir ta a. “Ka Fapa, Isua chu aman pe turin ka tir dawn a ni. I tuar ai a tuar ang a, nang chu hremhmuna i kal a ngai tawh lo vang. Chatuan atan ka kiangah i awm tawh ang” a ti a ni.
Eng vangin nge Isua chanchin [gospel] chu Chanchin Ṭha a nih? Bible chuan hringnuna i thil lo tihsual tawh zawng zawng leh la tihsual zel turte ngaihdamna chu Isua Krista chuan kraws ah a man a pe tawh. Isua kaltlang chuan Pathian nena in inzawm thei tawh ang. Chu chu Chanchin Ṭha a ni!
Bible chuan, “Keinin thil kan tih ṭhat vâng ni lovin, a khawngaihna avângin min chhandam ta a, siamtharnaa sil fai leh Thlarau Thianghlima siam thar kan ni ta a,” tiin a sawi [Titus 3: 5]
Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghakhlel takin an thlir reng che. Sawmna chu zau taka hawn a ni a. Ring la chang mai rawh.
I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria.
“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
Ngaihtuah zui atan.
• Isua chu i lo pawm tawh a nih chuan eng thil nge thleng a, engtin nge a thlen han sawi teh.
• Nangma theihna hmangin engtiang takin nge ṭhat i lo tum ve tawh? Chutianga i tumna chuan engnge a lo thlenpui tawh che?
• I thil lo tihsual tawh zawng zawngte chu Isua chuan a man a peksak tawh che tih hriatna awmzia chu engnge ni?
[ *Lettu:* Peka]
No comments:
Post a Comment