Thursday, June 4, 2026

PATHIANA INNGHAH CHUNGCHANGA NUN INKAWKALH

 _Malsawmna Nih Theihna Kawng_


By Rick Warren

May 4, 2026



“Nangmaha chakna nei mi chu a eng a thâwl e.” [Sam 84:5]


I chau em? Chau takin i kal hram hram a ni thei a, a tawp a tawpah phei chuan i chakna zawng zawng chu i sawr chhuak vek pawh a ni thei. A chhan chiang tak a awm: Mihring i nih vang a ni. 


I chakna chu a beitham a ni. Mahse Pathian chakna chuan tawpintai a nei lo. I chakna chu a tlem a. Mahse Pathian chakna erawhin bithliah a nei lo. I chakna chu a zo mai thei a – chu tak chu i chauh chhan chu a ni! Pathian chakna erawh chu a zo ve thei lo. Pathian chuan chakna a tlachham ve ngai lo va. Pathian chu a hah ve ngai hek lo. 


Sam 84: 5 chuan hetiang hian a sawi, “Nangmaha chakna nei mi chu a eng a thâwl e,” tiin. I nunah khan Pathian malsawmna chan i duh em? A nih chuan nangma chakna rin chhan lovin a chakna i hmachhuan a ngai ang.  


Hudson Taylor-a khan kum zabi 19na lai vel khan China rama missionary ropui tak a ni. Thlarauva mi lian leh khawvel thila mi fing a tling phak. A kum a lo upat tak hnu chuan a lo bawrhsawm ta a, amah pawh a derdep ta hle. Chutiang dinhmun atang chuan lehkha a thawn a hetiang hian a ziak ta a ni, “Ka derdepin ka lo chak lo ta hle a, hna pawh ka thawk mumal thei ta lo. Ka chak lo hle a, lehkha pawh ka chhiar thei ta lo. Ka chak lo ta hle a Bible pawh ka chhiar thei ta lo. Ṭawngṭai pawh ka harsat ta hial. Ka tih theih chhun chu Pathian ang chhungah naupang buchip ang maia zal der der hi a ni ta mai e” tiin. 


Hringnunah engtik emaw lai chuan i chak loh em avang chuan i ṭawngṭai thei ta lovin, Bible chhiar, Bible zir leh thil dang pawh i thei ta mang lo a ni thei. Chutiang hunah chuan engnge i tih ṭhin? Lalpa chaknaah chuan – naupang buchip ang maiin – chawl der der mai rawh. 


Dik tak chuan i chak lohna chuan Pathian a rinchhantir che a nih chuan chu chu thil dang aiin a ṭha zawk fe a ni. II Korinth 12: 8-10 ah chuan Paula chuan hetiang hian a sawi, “Chumi chungchâng thûah chuan mi kiansan theih nân Lalpa chu vawi thum ka dîl a. Tin, ani chuan ka hnênah, “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” a ti ta a. Chutichuan, Krista thiltihtheihna chu ka chunga a awm theih nân, lâwm êm êmin ka chak lohnate hi ka chhuang tawh zâwk ang. Chuvângin, Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni,” tiin.


Chu chu Pathiana innghah chungchanga thil inkawkalh anga lang ṭhin a ni: I chak loh deuh deuh chuan amahah chuan i innghat deuh deuh ang a. Amah i rinchhan ang zel chuan i lo chak deuh deuh ang. 


Ngaihtuah zui atan. 


• Eng vangin nge a chang chuan kan chak lohna te chu tarlan a harsa kan tih? 

• I chenna khawvel chuan eng vangin nge chak reng tura a beisei che? 

• Pathian chakna rin chhan tih awmzia chu engnge ni? I nunah chutiang chu engtin nge a lan chhuah? 


*[Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...