Wednesday, June 3, 2026

I RILRU PUT HMANG NI LOVIN PATHIANAH ZAWK INNGHAT RAWH

_Malsawmna nih theihna kawng_

- Rick Warren
- June 3, 2026
_"I thinlung zawng zawngin Lalpa ring la, nangma hriatnaah innghat suh, i kawng zawng zawngah amah hre reng la, i kawngte chu a kawhhmuh zel ang che," Thufingte 3:5-7._

Thil pakhat dik em em a i hriat, mahse i tih tak tak hnua i tihsual em em si a awm em?

Rilru put hmang hian min bum fo thin. Hla lenglawng hlui tawh takah chuan, " A nawm viau lai hian a dik lo thei dawn em ni?" tih hi a awm a. I ti tak tak em? Tunah rih chuan dik angin lang mah se, thil dik lo tak tak a tam lutuk ringawt.

Thla ruk in inngaihzawn hnuah, "Eng rilru puin nge ka lo awm le?" i ti a. Kar hnih khat hna i thawh hnuah, " Engtin nge hetiang hian ka lo inhnamhnawih theih le?" i ti leh a. A tira hlauhawm loh hmel taka i thutlukna siam kha, kum tam tak hnuah chuan a tichhe vek che a, ser a hnutchhiah che a ni. 

I nunah kawng tâwp tawn tlema, hlawhchham lutuk lutuk lova awm i duh chuan Thufingte 3:5-7 in a sawi hi i ngaihthlak a ngai, "I thinlung zawng zawngin Lalpa ring la, nangma hriatnaah innghat suh, i kawng zawng zawngah amah hre reng la, i kawngte chu a kawhhmuh zel ang che," tih hi. 

 I nunah Pathian malsawmna dawn i duh tak tak chuan, i rilru put hmang emaw, i thinlunga lo lang hmasa ber khan a sawi ni lovin, Pathian finnaah innghat zawk rawh. Tawngkam danga sawi chuan, Lalpa ring la, nangma hriatthiamnaah innghat suh.

Chuti a nih chuan Pathian finna chu engtin nge i neih theih ang?

Ṭawngṭai la. Pathian be rawh. Bible i chhiar laiin ani'n a lo be ve thung ang che. Chu chu a finna i neih theih dan tur chu a ni.

Bible chuan Jakoba 1:5 ah, "In zingah tu pawhin finna a tlakchham chuan, mi zawng zawng hnena hau lo leh ui lova pe thintu Pathian chu dil rawh se, chutichuan a hnenah pek a ni ang," a ti.

Pathianin thil atthlak tak tak i tih a duh lova. I hlawhtlin a duh. I hun, i sum leh inlaichinnaah thutlukna fing tak i siam a duh.

Thudik tak chu, Pathian ṭanpuina i nghak a ni lova, amah zawkin a nghak che a ni. "Hei! heta hi ka awm. Finna ka pe ang che. Ka ui lo a nia. Fing taka siam che ka duh. Min dil mai rawh," a ti.

Malsawmna dawn i duh chuan Pathian finna i neih a ngai. Chu Pathian finna chu i duh chuan i dil a ngai a, dawng tura i inpeih a ngai a ni.

 Ngaihtuah zui atan

I nunah thutlukna lian tham tam siam nan i rilru put hmang rin tawp i tum kha han ngaihtuah teh. A rah eng nge ni?

Engtin nge Pathianin a biak ṭhin che? Amah ngei a ni tih engtin nge i hriat? 

I nuna a ruahmanna i hriat duh chuan ni tin Pathian nena hun hman chu eng nge a pawimawh chhan?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...