_Malsawmna Nih Theihna Kawng_
By Rick Warren
May 5, 2026
“Kei erawh chuan LALPA ka thlîr a, Min chhandamtu Pathian chu ka nghâk reng ang, Ka Pathian chuan ka aw a ngaithla dâwn si a.” [Mika 7: 7]
Hun chi hrang hrang i la paltlang dawn a ni tih chu Bible-in chiang takin a sawi a. Hun pawimawh tak pakhat Pathian a sawi nawn fo ṭhin chu amah nghah hun chu a ni.
I nghah mek lai chuan Pathianin hna a thawk reng a ni tih chu i ring tlat thei ang. I nghah lai chuan Pathian pawh a lo chawl ve tihna a ni lo. Dik tak chuan chu huna a hruai chhan che chu i tana hna thil ṭha zawk a tih duh vang a ni.
I hringnuna hun ṭhahnem tham tak kha thil eng emaw nghah nan i la hmang fo dawn. Chuvang chuan amah Pathian i nghah laia amah rin dan i zir lo a nih chuan i hun tam tham tak kha amah rin loh nan i hmang dawn tihna a ni ang.
Pathian chu a hmanhmawh ve ngai hauh lo, chatuan mi a ni si a! Hna a thawk mawlh mawlh a, amah ring turin a duh thung che.
“Lalpa engtikah nge?” “Engtikah nge a thlen dawn?” tihte chu i lo zawt nawn fo a ni thei. Pathian chuan, “Hetiang hian min ring thei ang” a lo ti thung.
Mihring mizia dik tak chuan, “Nghak suh! A rang thei ang berin che rawh” a ti mai a. Chu chu Pathianin mal a sawm tum dan che nen chuan an inang lo - a chhan chu Pathian malsawmna chu nghah vang vang a ngaih chang a tam hle. Thuhriltu 3: 11 chuan hetiang hian a sawi, “Engkim hi an hun ṭheuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tîr ata a tâwp thlenga thil a tih chu an hmu chhuak thei chuang lo,” tiin.
Thil engemaw nghah mek i lo nei em? Zirna in i chawlhsan hun a ni thei. I nupui pasal atana mi dik tak i lo nghak mek a ni thei. Inneih hun lo nghakin, nau/fa in nghak a ni thei a, hna eng emaw tak in lo nghak a ni thei bawk. Hun inher vel dan chu a muang chang lutuk tlatin i hre a hial thei. Chutiang chu mitin ten kan paltlang vek.
Bible-ah chuan Pathianin hna a thawk ṭhin a ni tih ni mai lovin engtiangin nge a thawh tih tarlanna a awm. Chu chu i nghah lai mek pawh chuan i hauh a ngai: “An hnam zînga tê ber leh tlâwm ber chu Hnam ropui tak an la ni ang. Kei LALPA hian a hun takah ka ti thuai ang.” [Isaia 60: 22]
Chutiang tho chuan a ni Isua khawvela a lo tirh lai pawh khan a thawh ni. A vawi khat lo kalna kha khawvel chuan kum sang chuang a lo nghak a. Tichuan a hun takah chuan a lo kal ta a nih kha.
Isua lo kal lehna hi kum 2000 chuang chu kan lo nghak ve leh ta. Chu chu engtikah nge a thlen ang? A hun tak - Pathian hun ruatah ngei chuan. Chu hunah chuan a lo let leh ang.
Chutiang deuh chuan i hun tawn mekah pawh i lo inbuatsaih thei ang. A la thlen mai loh avangin a lo kal dawn lo tihna a ni lo. Pathianin “Aih” a ti nia i hriat chu “Tunah lo deuh” a tihna chauh a lo ni thei. Hetiang hun hrang hrang karah hian i la ring zel thei dawn em?
Mika 7: 7 chuan hetiang hian a sawi, “Kei erawh chuan LALPA ka thlîr a, Min chhandamtu Pathian chu ka nghâk reng ang, Ka Pathian chuan ka aw a ngaithla dâwn si a.”
Hetiang rinna ang hi Pathian chuan mal a sawmsak ṭhin.
Ngaihtuah zui atan.
Pathianin i nuna, ti tura i beisei, lo nghah mek i nei em? Chu nghah hun i hman mek chu engtin nge i lo hmachhawn?
Pathian hun ruat i nghah hun lai chu han ngaihtuah teh. Chutiang hunah chuan engtin nge Pathian chuan hna a thawh?
Hmanhmawh a awl - mahse Pathian malsawmna chu amah ngahktuten an chang ṭhin. Engtin nge dawhtheihna leh rinna zir chhuak tur chuan i kal muan hlek theih ang?
[ *Lettu:* Peka]
No comments:
Post a Comment