Thursday, June 25, 2026

NGHET TAKA NUNG ṬHINTE HAMTHATNA

_Malsawmna Nih Theihna Kawng_

By Rick Warren
June 25, 2026
“Mi fel, ama remruat thiama awm mi fate chu an nihlawh e.” [Thufingte 20:7] 

Bible chuan mi nghet leh rin tlakte chu Pathianin mal a sawm ṭhin tih a sawi – thinlung thianghlim te chu. Isua ngei pawhin, “Thinlunga thianghlimte chu an eng a thâwl e; Pathian an la hmu dâwn si a” tiin a sawi bawk [Matthaia 5: 8] 

Thinlung thianghlim tak leh dik taka i nun i hman chuan eng ang malsawmna nge Pathian aṭangin i beisei theih ang? 

Mahni inrintawkna malsawmna i nei thei ang. 

Mi nghet leh rintlak i nih chuan miten i bula khawsak nuam an ti ang, a chhan chu nangmah leh nangmah khan i nihna i hre chiangin i awm dan i hre chiang tlat. 

Thufingte 10: 9 chuan, “Ngîl taka kal chu muanawm takin a kal ṭhîn a, A kawng tikhawlotu erawh chu hriat chhuahin a awm ang,” tiin a sawi.

Mi nghet i nih loh chuan ruah nasa tak sur zawh hlima kawng nal kawi taka kal ang i ni ang. Tluk loh tumin theihpatawp chhuahin i kal pai chawn chawn dawn a ni. Mahse nghet taka khawsa ṭhin mi i nih chuan lei char nghet taka ding ang i ni ang. 

Hnuhma duhawm tak hnutchhiah theihna malsawmna i nei ang. 
I hnuhma ropui ber chu i nghehna chu a ni thei, a chhan chu, chu chuan chhuan tam tak a daih dawn si a. Thil dang chu an la kiam duak dawn. I liam hun chuan i sum chu an la insemin i chhungten an la inrochun ang. I hna pawh tuten emaw an la chang ve ang. Lawmman i dawn chi hrang hrangte chu khawi lai kil emawah hnawlin an la paih mai mai ang. 

Mahse i nun ṭha erawh chuan i chenpuite chu a khawih danglam ang a, chhuan lo la awm leh turte chu nasa takin a hruai ang. Chhuan tam tak a daih ang. 

Bible chuan Thufingte 20:7 ah chuan, “Mi fel, ama remruat thiama awm mi fate chu an nihlawh e” tiin a sawi. 

Chatuan hmunah chuan lawmman i la chang ve ang. 
Matthaia 25: 21 chuan hetiang hian a sawi, “Bâwih ṭha leh rinawm, i tiṭha e; tlêm te chungah i rinawm a, tam tak chungah ka awmtîr ang che; i pu lâwmnaah lût rawh,” tiin.  

Kan nuna hun pawimawh, mite pawhin min en ṭhup lai, eng emaw aṭang chuan lawmman dawng turah kan inngai ṭhin. Mahse thil kan tih te tak tete zawk chuan eng ang taka mi nghet nge kan nih tih chu a tarlang zawk fo. Tun kar chhunga mite i fuihna ṭawngkam zawng zawng, lainatna nena i thil tih te, thlemna i lo hnar zawng zawngte avang chuan chatuan hunah chuan lawmman pek i la ni ang. 

Chatuan chu hun ropui tak a ni. I nun chu nasa takin a tidanglam thei, tunah a ni a, chatuan hun atan pawh a ni bawk!

Ngaihtuah zui atan. 

• Nghet taka nung tura beisei i nih laia i lo nunpui si loh hun chu han ngaihtuah let teh. Chu chuan engtin nge i rilru, thlarau leh tisaah nghawng a neih? 
• Nun nghet neitu i nihna chuan chhuan lo la awm leh tur chu engtin nge a hruai ang? 
• Tun kar hun chhunga i thiltih te tak te ni si Pathian tana i rinawmna tarlangtu ni si chu engnge ni? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...