Friday, June 26, 2026

INNGHIRNGHONA CHINFEL: RAHBI PAKHATNA

_Malsawmna Nih Theihna Kawng_

By Rick Warren
June 26, 2026
“Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? … Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.” [Matthaia 7:3, 5]

Hringnuna thiam thil pawimawh ber pakhat chu innghirnghona boruak chinfel a ni. I zir thiam a nih loh chuan i dam chhung hun tam zawk hrehawm ti takin i hmang ṭhin ang. Eng vangin? A chhan chu mi famkim lo kan ni ṭheuh mai a, innghirnghona eng emaw neuh neuh hi chu kan la hmachhawn chamchi dawn. 

Innghirnghona boruak tidai tur chuan a chang chuan a che chhuak hmasa zawk i nih a ngai ang a. Chutiang ti tur chuan Pathian ṭanpuina i dil a ngai ang. 

Tute emaw buaina i neihpui chu in buaina sawi dun tura sawm chu huaisen hle a ngai ṭhin. Amaherawhchu, chu rahbi chu vawi khat i rap tawh a nih chuan midang tih dik loh eng emaw chu i sawi kher tawh kher lo vang a, anmahni demna sawi tum tawh lovin i pawi an sawina pawh sawi chhuah kher i tum lo vang. I tihdik lohna lai chu i thil sawi hmasak a ni tawh ang.   

Nangmah thiam lohna lai chu i hmu lian ber ang. In innghirngho chhan bul chu zaa 99.9 vela midang thiam loh pawh ni se nangmah lam thiam lohna chu i pawm mai thei ang. Midang i biak dan emaw i rilrua chapona emaw pawh a ni thei a. Kawnga i kal dan mai mai pawh a lo ni thei bawk. 

Nangmahah khan chak lohna nangmahin i hmuh phal mang loh mahse midangten chiang taka an hmuhsak si che a awm. Chuvang tak chuan thinlung lam tlawm taka i buaina chinfel chu i tih tur a ni. 

Isua chuan, “Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? … Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang,” tiin a sawi [Matthaia 7:3, 5].

I mitah khan eng ang thing ṭang/khanchhuk nge i kiang vela thil awm fiah taka hmuhtir thei lo che? I tihdik lohna lai chu i puan chhuah hma chuan mi tuten emaw an tihnatna che chu sawi hmasa suh. 

Midang i ngaihchan tawk loh avangin tute emaw nen in inghirngho em? I ngaihchan leh lutuk vangin in buai em? Mi tu emaw i tihnat chungah chuan lainatna i lantir em? I duh khirh lutuk em? Eng nge i chak lohna lai chu? 

Chung thilte chu i hriat chhuah a, ngaihdam i dil thei a nih chuan innghirnghona thuhlaa i buaina chingfel turin rahbi pahnihna chu i kai thei tawh ang. 

Ngaihtuah zui atan. 

• Engin nge keimahni sualna min hmuh fiahtir lo ṭhin? 
• Midangte nena buaina in neih changin mite dem mai lova mahni inpawmna chuan engtin nge midang a nghawng? 
• I nunah khan buaina chinfel loh i neihte han ngaihtuah teh. Chu buaina chu chinfel turin engtin nge hma i lak ang? Engtin nge i chet chhuah hmasak ang?  

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...