Wednesday, June 24, 2026

I KALNA APIANGAH MI NGAI RENG I NI EM?

_Malsawmna Nih Theihna Kawng_

- Rick Warren
- June 24, 2026
_"Thinlunga thianghlimte chu an eng a thawl e, Pathian an la hmu dawn si a," Matthaia 5:18._

Chatuan daih nunna nei turin i thawk em? I thawk a nih chuan rinawmna nena nung tura i zir a ngai a ni.

Bible chuan Matthaia 5:8-ah, "Thinlunga thianghlimte chu an eng a thawl e, Pathian an la hmu dawn si a," a ti. 

'Pathian hmu' tih awmzia chu Pathianin min awmpui tih hriatna hi a ni. Thinlung thianghlim neitute chuan Pathian thiltihtheihna an tem a. Pathin ngaihdamna an chang a. An nun atana Pathian thil tum an hria a. Pathian thlamuannaah an chêng ṭhin.

Chutiang mi nih chu i duh em? Tunlai hian thinlung thianghlim neih chungchang kan sawi tam lo viau mai a, a awmze thuhmun sawina ṭawngkam dang kan hman ṭhin chu rinawmna (integrity) a ni.

Rinawmna neih chu famkim tihna a ni lo, a chhan chu chutiang a nih chuan tumah hian kan nei dawn lo! Chuvangin rinawmna neih chu eng nge a awmzia ni ta ang?

*Rinawmna chu pumkhata awmna a ni*.
Mi tam tak chuan an nun hi chhang zai bun anga ngaiin an phel hranga, hetiang hian an sawi ṭhin:

"Hei hi ka hna a ni a. Hei hi ka hnathawhna nun a ni. Hei hi ka thlarau nun. Hei hi ka chhungkaw nun. Sawtah sâwn ka khawtlang nun a awm a. Hetah hian ka nun thuruk - ka chak lohna te, ka ngawlvei te, ka sualna thuruk te, tumahin an hriat loh chu a awm, " tiin. 

Hetianga i nun i ṭhen hrang a nih chuan rinawmna i tlachham a ni, a chhan chu rinawmna chu khawi hmunah pawh ni se i ṭawngkam, i thiltih, i rilru put hmang leh i nun kawng tinrengah mi ngai reng i ni tihna a ni.

*Rinawmna chu tihchhiat loh rilru put hmang thianghlim a ni.*
Rinawmna i neih chuan thil dik tak chu a chhan dik tak avangin i ti ṭhin. I rilru chu a thianghilm a, pawlh dal a ni lo. I nun kawng tinrengah leh mi zawng zawng lakah i tlang a, i titak ṭhin. Mi dang hmuha mawi atan ni lovin, Pathian biak nan i ṭawngṭai ṭhin. 

Bible chuan," Mi rilru bawlhhlawhte chu Lalpa tana tenawm an ni a, an kawnga mi fel famkimte erawh chu a lawm zawng an ni."

Keini chuan lan mawina kan ngaihtuah a, Pathian erawh chuan rinawmna a ngaihtuah. Keini chuan hming ṭhatna kan ngaihtuah a, Pathian erawh chuan nungchang a ngaihtuah. Hming ṭhatna chu miin tu nge i ni tih an rin dan nen a inkungkaih a, rinawmna chu i nihna dk tak a ni. I hming ṭhatna chu vantlang hma a i lan dan nen a inzawm a, rinawmna chu Pathian nena mahni chauha i awm laia i nihna nen a inzawm.

I nungchang leh rinawmna aiin, i hmel lan dan leh hming ṭhatna i ngaihtuah nasa zawk em? Vawiinah hian mi rinawm nih tum tlat rawh.

Ngaituah zui atan

I nun peng tina mite, i thawhpui te, i ṭhenawm te, i chhungte leh i ṭhianten nangmah sawina ṭawngkam inang vek an hmang ang em? Eng vangin nge an hman ang emaw, an hman loh ang?

I nunah rinawmna entirna ṭha tak nei pakhat ngaihtuah la. Chumi laka ze ṭha bik pakhat i zir theih chu eng nge ni ang?

Eng hunah nge nungchang aiin, hming ṭhatna vawnhim i duh zawk ṭhin? Eng vang nge?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...