Saturday, April 4, 2026

THIHNA HI HLAUH TUR A NI LO

 Khawngaihna Thilmak_

- Rick Warren 

- April 04, 2026



_"Tin, 'Isu, i ram i thlen hunah mi hre reng ang che,' a ti a. Tin, ani chuan a hnenah, 'Tih tak meuhvin ka hrilh a che, vawiinah hian ka hnenah Paradis-ah i awm ve ang,' a ti a."_ (Luka 3:42-43)


Thihna hi pumpelh theih a ni lo. Engtikah emaw chuan kan la thi vek dawn. Khawvel mihringte zingah thihna hi zaah za a la thleng reng!


Mi tam tak chuan thih hi an hlau, mahse Pathianin i hlauh a duh lo. A khawngaihna avangin thih i hlauh a ngai lo tih a lantir zawk a ni.


Luka bung 23-naah chuan mi pakhat thi mai turin Pathian khawngaihna a dawn thu kan hmu. A thawnthu hi i la hre rengin ka ring: Isua kha krawsa khenbeh anih khan misual pahnih a sir tawn tawnah khenbeh an ni ve a. Bible chuan heti hian a ti, _"Tin, an mi sual khai pakhat chuan Isua a hau va, 'Krista chu i ni lo vem ni? Intidam la, keini pawh min tidam ta che,' a ti a. Nimahsela pakhat chuan chhan pahin a zilhhau va, 'Pathian meuh pawh i hlau na nge? Thuhmun rengin an hrem che hi. Keini zawng hremzia reng kan ni; kan thiltih man chauh hmu kan nih hi; he mi hi zawngin engmah a tisual si lo,' a ti a."_ (Luka 23:39-41)


Misual pakhat zawk khan Isua a tiel thihna hi a tawpna emaw a ti a - mahse a hre sual tlat. Thihna hi chatuan intanna chauh a ni, vanram emaw meidilah emaw hmang turin.


Misual pkhat zawk erawh chuan heti hian a ti thung, "I dinhmun chhiatzia kha i hre lo em ni? Hun rei lote chhung Pathian nen hmaichhanah in intawk dawn a, tunah Isua i hmusit vel a maw?" tiin. Tichuan Isua lam hawiin, "I ram i thlen hunah mi hre reng ang che" a ti a (Luka 23:42).


Engtinnge Isuan a lo chhan? _"Tih tak meuhvin ka hrilh a che, vawiinah hian ka hnenah Paradis-ah i awm ve ang"_ (Luka 3:43).


Hei hi hun tawp tep kara khawngaihna chu a ni! Kha rukru khan a natna chhawk aiin a sual ngaihdamna kha a mamawh ber a ni tih a hre tlat. Chuvang chuan, "Min hre reng ang che" a ti a ni. Isuan, "Chu chu a tawk em em e" a lo ti bawk a. Isua chhanna khan thihna chungah pawh thu a nei a ni tih a lantir.


Isua khawngaihna i pawm khan thihna i hlauh a tul lo - krawsa Isua hnathawh zawng zawng avang khan.


Ngaihtuah zu atan.


Isuan misual pakhat hnena, _"Vawiin hian ka hnenah Paradise-ah i awm ang"_ ti a a chhanna hian eng ang takin nge zahngaihna i chunga lantir a duhzia a entir?


I mithmuhah tuin emaw Isua hi fiamthu thawh nan a hmang tawh em? Engtinnge i lo chhan?


Krawsa a thih mek lai pawh khan hmangaihna leh khawngaihna lantir turin Isuan hun a inpe tlat. Tunah khan Pathian hnenah a hmangaihna thuk tak avangin lawmthu sawi la, midangte hnena khawngaihna lantir turin hun remchang hriatthiamna dil rawh.


*Thawhleh Ni Thutiam: Krista hnena awm tawhte tan chuan thiam loh channa reng a awm lo.*


Krawsa Isua hnathawh avang khan thihna i hlauh a tul tawh lo. Isuan i sual man pe tawhin vanramah i tan chatuan in nuam tak a buatsaih a ni. Mahse chatuan nunna chu thawh chhuah theih a ni lo. Chu thilpek chu Isua pawmna kaltlanga neih chi a ni. Bible chuan heti hian a sawi, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9).


Pathian khawngaihna i la dawng lo anih chuan engvangin nge i nghah khawtlai reng ang? Isua zui tura i inpeih anih chuan heti hian tawngtai la:


"Lalpa, i khawngaihna ka mamawh e. Engtikniah emaw thiin chatuan ka la hmachhawn dawn tih ka hria. He leia ka nun hi a inchawh pawlh nuai mai a. Nang aiin thil dang ka hmangaih thin. I duhzawng ni lovin ka duhzawng angin ka nung a. Ka sual a, i ngaihdam ka dil e. Tun atang hian i duhdan anga nun ka duh e.


"Isu, min khawngaih em avanga ka tan krawsa i thih avangin ka lawm e. I ngaihdam ka phu lo tih ka hria a. Famkimna hmun vanrama lut tlak ka ni lo tih pawh ka hri. Chuvang chuan kraws misual an khenbeh ve ang khan: 'Min hre reng ang che.' Meidil atang maia min chhanchhuak lovin, ka natna, chin than tha lo leh tlukna min thlen thin thilte lak ata min chhandam turin ka ngen a che.


"Min khawngaih avangin ka lawm e! Khawngaihin i chhungkuaah min pawm la. Isuan krawsa ka tana a thawh avangin hei hi ka dil e. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...