_Khawngaihna Kara Thilmak_
By Rick Warren
April 02, 2026
“Kei pawhin thiam loh ka chantîr lo va che; kal la, tûn hnuah tisual leh tawh suh," [John 8:11]
Isua Krista zuitu i nih chuan mitinte chu zah taka biaa khawsakpui turin Isuan a duh che. An awm dan, ngaihtuahna leh thlarau nun chu a danglam deuh a nih pawhin chutiang chu a ni tho. Midangte chu zah taka khawsakpui turin a duh che. Eng vangin?
A chhan chu, Isua awm dan chiah a nih vang a ni.
Isua chuan mitin a pawm. Miten an thil tih zawng zawng chu a lo pawmpui tihna a ni lo. Nang pawh i thil tih zawng zawng chu a pawm kher lo, i zahawmna leh nihna hre reng chungin a enkawl zawk che a ni.
Johana 8-ah chuan hmeichhe pakhat mite hmuhsit chu zahawm takin a bia a, mahse amah thiam loh chantirtute chuan an ti ve lo. Isua hmaah chuan rawn hruaiin “Zirtîrtu, he hmeichhia hi a uire lai an man a ni, a uire lai takin. Dân lehkhabuah Mosian hetiang mi hi lunga den hlum thu min pe a; nangin engtin nge i ngaih?” an ti zung zung a nih kha [Johana 8: 4-5]
Isua khan amah awh nan leh thil a sawi suala thiam loh an chantir theih nan an zawt a ni tih a hria a, tichuan, Isua a kûn a, a kutzungtangin leiah a ziak a. Tin, an zawh sek sek avângin ani chu a tho va, an hnênah, "In zînga sual nei lo apiangin amah chu lungin dêng hmasa rawh se!” a ti ta daih a [Johana 8: 6-7].
Vaivut zinga Isua thil ziah chu engnge a ni tih tuman an hre lova, Bible pawhin a awmzia min hrilh hek lo. Mithiam ṭhenkhat chuan amah hektute thiam lohna kha a ziak a ni ang an ti: an rorelna hleihluak emaw, an khawlh zia emaw, an rinawm lohna emaw an nupui laka an sualna emaw a ni thei. Isua kha Pathian a nih tlat avangin an sual zep rukte chu a hria a, an thinlung zawng zawng pawh a hmu tlang vek bawk.
Amah thiam loh chantirtute khan a tawpah engtin nge an awm tak? Johana 8: 9 chuan, “pakhat khatin an relh chhuak ta zel a, chutichuan Isua chauh a awm ta a, hmeichhia, a laia a awmna ngaia awm nen khan,” tiin. Chu hmeichhia thiam loh chantir tur chuan an inhawrkhawm tuau tuau zui tawh lo.
Isua pawhin thiam loh a chantir hek lo. Zahngaihna an chungah a lantir ta zawk a ni. Johana 8: 11 chuan Isuan, “Kei pawhin thiam loh ka chantîr lo va che; kal la, tûn hnuah tisual leh tawh suh," a ti ta mai a.
He hmeichhia hian thil a tisual ngei em? Aw. A pasal a uiresan a ni. Mahse Isua chuan a zahawmna chu mite hmaah a vawnhimsakin a sualna chu awmze nei takin a hmachhawnpui a ni. Tichuan, “Tun chinah chuan tisual leh tawh suh,” a ti a. Kha hmeichhia kha a thlak danglam ta a ni.
Hei tak hi Isua ka hmangaih chhan chu a ni – a chhan chu keimah pawh hi hetiang chiah hian min chingfel a ni. Zahngaihna nen min kuangkuah a, ka phu lo em em chung pawhin. Chu chu i nunah a thil tih tho chu a ni – chutiang chiah chuan midang pawh ti ve turin a duh bawk che.
Ngaihtuah zui atan.
• Isua chuan engtik lai khan nge nangmah thiam loh chantir lo chein zah taka dawngsawng chein zahngaihna nen a hruai che?
• Isuan thiam loh chantir lo che a zahngaihna leh khawngaihna i chungah a lantir chu i tan engnge awmzia a neih?
• Isuan zah taka khawngaihna i chunga a lantir ang chuan midang an phu ang ni lova dawnsawn i lo nei ve tawh em?
[ *Lettu:* Peka]
No comments:
Post a Comment