_Thlirna Thlak Danglam_
By Rick Warren
- December 04, 2025
“Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang.” [Marka 11:24]
Vawiin hian cheque-in cheng sing khat pe ta che ila, lawmthu min hrilh turin thil dang i nghak leh kher ang em? Tu pawh keimah min hre chiangtu chuan, “He mi hi mi ṭha tak a ni a. Heti zat sum hi a nei ngei a, min pe thei ngei a ni. Lawmthu pawh ka hrilh mai ang,” an ti ang. Lawmthu min hrilh hmasa mai ang a – tichuan bank lamah chu pawisa tak tak la chhuak tur chuan an kal nghal mai ang.
Pathian thutiam chu thutiam dang zawng zawng aiin an ṭha zawk. A thutiam chu a taka i dawn hma hauh pawhin, “Lalpa ka lawm e. I thutiam chu an thleng dawn tih ka hria a. Ka ti ang i tih chu i ti ngei bawk ang,” i lo ti thei ang.
Hebrai bung 11-a “Rinnaa Fak Hlawhte” [Faith hall of fame] tarchhuah zingah khan mi ropui tak tak an awm. Joshua’n Israel fate Jericho a hualpui chanchinah khan, khawiah nge kulh a chim? Engtin nge an tluk? Hebrai 11: 30 chuan hetiang hian a sawi, “Rinnain Jeriko khaw kulh kha ni sarih an hual hnuin a chim ta a,” tiin.
“Rinnain” tiin a sawi a nih kha. Kha thu kha hetiang hi a ni, Lalpan Josua hnênah, “En teh, Jeriko leh an lal leh mi chak huaisente hi i kutah ka pe tawh e. Tin, râl kâp mi zawng zawng hian khawpui hi vêlin vawi khat chu in han vêl chhuak phawt ang a. Chutiang chuan ni ruk in ti tûr a ni. Tin, puithiam pasarihin bâwm hma lamah berâmpa ki tawtawrâwt pasarih an keng ang a; tin, a ni sarih ni chuan khawpui chu vawi sarih in vêl chhuak ang a; tin, puithiamten tawtawrâwtte chu an hâm ang. Tin, heti hi a ni ang a, berâmpa ki an ham rîk ruai ruai huna tawtawrâwt ri in hriat chuan, mipui zawng zawng chu ring takin au dur dur rawh se; tichuan, khawpui kulh chu a chim rup ang a, mipui chu mahni hma zâwn ṭheuhvah chuan an chho vang,” tiin [Joshua 6: 2-5].
Chu chu thil thlen dan dik tak a ni. Israel mite chuan Pathian thupek an zawm a, kulh kha a chim ta mai a ni. Pathian chu a thutiam angin a che bawk!
Vawi eng emaw zat ka ngaihtuah ve ta, ni sarih chhung kulh kal hualtute zingah khan tel ve ta ila tih hi ka ngaihtuah fo mai. Mi eng emaw zatte chuan kha kulh kha an lo en fo tawh ngei ang, an mangang tial tial thei a, engtin nge Pathian chuan a tihchim ang tih an chhut ngei ang. Mahse Bible chuan, “Rinnain Jericho kulh chu a chim ta a,” tiin a sawi. Pathian thil tihtheihna chu an ngaihtuahin lawmthu an hrilh lawk a ni.
Chu chu Isuan i nun hman dan tura a duh chu a ni a, Pathian hnena lawmthu lo sawi lawk turin a duh che. Isua chuan Marka 11: 24 chuan hetiang hian a sawi, ““Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang,” tiin.
Pathian hnenah thil eng emaw i dil chang, i ring tak tak chuang lo a nih chuan engah nge dil pawh i dil? Thil tih awmze nei lo a ni.
Isua chuan ṭawngṭaia Pathian hnena thil eng emaw i dil a nih chuan a ti ngei dawn a ni tih i ring thei ang tiin a sawi. Lawmthu I lo hrilh lawk thei ang a. Engtin nge a chhan dawn che tih pawh i lo ngaihven thei ang.
Ngaihtuah zui atan.
• I ṭawngṭai chuan Pathian hnen aṭang chuan eng thutiam ngei i hauh ang? Pathian thutiam tam zawk chu engtin nge i beisei theih ang?
• I ṭawngṭai nun chuan engtin nge thlarau nuna i puitlinna a tarlan? A nih loh leh, ṭawngṭaina nun hmang chuan engtin nge nun puitling zawk i lan chhuahtir ang?
• Pathian chu engnge i lo dil mek? A thutiamte chu a hlen dawnin i ring em? Eng vangin nge?
[ *Lettu:* Peka]
No comments:
Post a Comment