Wednesday, December 3, 2025

RINNA BEIDAWNG LO CHU

_Thlirna Thlak Danglam_

- Rick Warren
- December 3, 2025
"Rinnain lal thinurna chu hlau lovin Aigupta ram a kalsan a, hmuh theih lohva chu a hmuh avangin a tuar ṭan ṭan a ni," (Hebrai 11:27).

Kan hnam nunphungin nghet taka rindan a neih chu a ṭha ni a i hriat chu ti mai rawh tih hi a ni. Kan duh emaw duh lo emaw hei hian mi tin min khawih a. Mahse i rilru put hmangin a thunun che i phal a nih chuan ṭha ni a i hriat angin i nung mai dawn a ni.

Mahse Pathian chuan nundan danga nung turin a duh che a ni - ṭha i tih ang ni lovin, rinna a nung turin. Thudik tak chu, thil tih tur dik tak tih hi a chang chuan ka châk reng fo lo . Nang pawhin i chak bik reng lovang. Mahse Pathian chuan ṭha ni a i hriat ang ni lo rinna beidawng lo chu a pe dawn che a ni.

I han hawi vel khan mi hlawhtlingte chuan tih an chak lem loh thil an ti fo ṭhin tih i hmu ang. Anni chuan miin tih an duh loh thil an ti ṭhin a ni.

Mi tih baka i beih loh chuan Olympic intlansiaknaah i tel ve thei lovang a. Darkar tam tak i zir loh chuan rimawi tum thiam i ni thei lovang.

Hemi dan tho hi Pathian mi, ringtu puitling ni tur pawhin a dik a ni. Pathian nena inlaichinna thuk zawk neih i duh chuan châk lo chung pawhin amah nena inpawlna hun hmang ang che. Pathian nena nuam ti taka hun hmang ṭhin hriat i nei em? Châk lo chung pawhin amah nen hun an hmang hram hram ṭhin a ni.

Rinna leh beih hram hramna hi thil kal kawp tlat a ni a. Rinna chu hah chung chung pawh a beidawn loh hi a ni. Rinna chu bansan duh miah loh hi a ni a. Rinna a i nun chuan beidawng lovin i bei hram hram dawn a ni.

Mosia hi rinawm taka beidawng lova nung entawntlak mi ropui tak a ni. Hebrai 11:27 chuan, "Rinnain lal thinurna chu hlau lovin Aigupta ram a kalsan a, hmuh theih lohva chu a hmuh avangin a tuar tan tan a ni," a ti.

Mosia chuan he thudik pawimawh tak hi a hrechiang hle. Hmuh theih loh chu i hmuh hunah chauh tih theih loh chu i hlenchhuak thei dawn a ni.

Pathian chuan beidawng lo turin chakna a pe dawn che a. In nupa inkara beisei bo tawh kha tinung thar leh turin thiltih theihna a pe ang che. I tluk pawhin tho leh turin thiltih theihna a pe dawn che a. Sum leh paia tlakchhiatna hmawra i awm a nih pawhin kal zel thei turin thiltih theihna a pe ang che a. Nawrna a nasat viau pawhin i ngaihdan nghet tak chu vawng tlat turin theihna a pe dawn che a ni.

Beih hram hramna hi rinna bul chu a ni a. Pathian chuan kal zel thei turin chakna a pe ang che. I harsatna ni lovin Pathian en tlat zawk ang che.

Ngaihtuah zui atan.

I nun khawilai berah emaw khan tlawmsan mai duhna lai i nei em? Nangmah ngaihsaktu che bulah hemi chungchang hi han sawipui teh.

I tumna leh beih hram hramna chu engin nge dâl tum le? Taksa chauhna? Hrilhhaina? Hun kal tawha phurrit?

Chu dâlna chu hneh turin eng thilin nge ṭanpui thei ang che?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...