Thursday, October 2, 2025

ṬHAHNEMNGAI TAKA ṬAWNGṬAINA PATHIANIN A CHHAN DAN KAWNG LI

_Harsatna Paltlang Tura Pathian Dil_

By Rick Warren
— October 02, 2025
"Ṭawngṭai fo ula, Pathian chu in mamawh apiang dîl ula, Thlarau hruai ang zêlin eng hunah pawh ṭawngṭai rawh u. In ṭawngṭainaah chuan mi thianghlim zawng zawng tân bâng lovin dîl rawh u." [Ephesi 6:18]

Ṭawngṭaina chhan loh a awm tak tak ngai lo. Pathian chuan i duh dan angin a chhang lo mai thei a, mahse heng kawng li zinga a pakhat emaw tal hian a chhang ngei ngei ang che: 

*I thil dil a dik loh chang chuan Pathian chuan “Aih” a ti.* 
Pathian chuan i tana pawi thei thil chu a pe ngai lo vang che. A tha ber chauh a pe ang che! A chang chuan “aih” tih chang a nei a, a chhan chu i tana thil tha ber a ruahmansak che chu i thil dil nen chuan a inmil lo a ni thei. 

*I tihdik loh chang chuan Pathian chuan “Ṭhang rawh” a ti.*
Pathian chuan thil eng emaw pek che a duh a ni mai thei – malsawmna ropui tak i suangtuah phak aia lian zawk – mahse chu mawhphurhna atan chuan i la inpeih chiah lo a ni thei. Tunah chuan lo pe ta che pawh ni se nangmah tibuaitu a nih dawn vang a ni thei. Ṭawngṭai bansan suh! Pathian Thu chu chhiar chhunzawm zel la, Krista chu a hmasa berah dah zel ang che. 

*A hun a dik loh chuan Pathian chuan “Kal muang rawh” a ti.*
Bible chuan, “He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo” tiin a sawi a (Habakuka 2: 3). A lo kal mek a, a lo la thleng lo deuh mai a ni ang. Pathian chu a hmanhmawh lo hle, i hmachhawn theih hma chuan. Thlarauva ṭhanlenna chu a tahtawl te tea a kal a ngai. Hun pawh a duh deuh ṭhin. 

*I thil dil te, I mizia, a hun te an inhnekrem vek hun chuan Pathianin “Awle” a ti ṭhin.* 
Ephesi 6: 18 chuan, "Ṭawngṭai fo ula, Pathian chu in mamawh apiang dîl ula, Thlarau hruai ang zêlin eng hunah pawh ṭawngṭai rawh u. In ṭawngṭainaah chuan mi thianghlim zawng zawng tân bâng lovin dîl rawh u" tiin a sawi [Ephesi 6:18]. Pathian hneh tuma ṭawngṭai ngut ngut chu a ni mai lo. Pathianin “awle” a tih huna nangmah lam zawk chu i lo inpeih theih nan ṭhahnemngai takin i ṭawngṭai ṭhin ang. 

Pathian chuan i ṭawngṭaina chu a chhang dawn a ni tih ring tlat ang che. Chhana i duh dan emaw beisei dan emaw chu a ni kher lo vang, mahse i ṭhatna tur leh Pathian ropuina tur chu a ni zel ang. 

Ngaihtuah zui atan. 

• I ṭawngṭai chhanna nghakin Pathian chu rei tak i lo nghak tawh a nih chuan engtin nangmah leh nangmah kha i infuih ang? 

• Pathian hun tiam chu i ring em? Eng vangin nge? 

• Pathianin “kal rawh” a tih hun kher i nghak a nih chuan engtin nge a thu i nghah lai chuan thlarauvah i lo ṭhanlen theih ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...