Wednesday, October 1, 2025

ṬAWNGṬAI FAN FANNA CHUAN I DAH HMASAK ZAWK A TILANG

_Harsatna Paltlang Tura Pathian Dil_

- Rick Warren
- October 1, 2025
"Jentail ten chung zawng zawng chu an zawng thin a ni. Chung zawng zawng chu in mamawh tih in Pa vana miin a hre reng a ni. A ram leh a felna chu zawng hmasa zawk rawh u, tichuan, chung zawng zawng chu a pek belhchhah dawn che u nia," Matthaia 6:32-33.

Pathian chuan i ṭawngṭaina kha chhâng turin a nghak reng. Thil eng emaw atana vawi khat aia tam i ṭawngṭai hian Pathian  hmin i tum vang a ni lo. Beidawng lova i ṭawngṭai fan fan khan i dah hmasak zawng Pathian i hriattir tihna a ni.

Ṭawngkam danga sawi chuan i ṭawngṭai fan fan khan i dah pawimawh hmasak zawk a lantir a ni. Ṭawngṭai nawn fo hi a manhla lo a nih chuan, a pawimawh hmasa zawk lo tihna a ni ang.

I tana pawimawh hriat i duh em? I mangan nasatpui apiang kha a ni mai. Manganna hian i nuna thil pawimawh a hrilh che a. I manganpui viau chuan i tan a pawimawh tihna a ni. I manganpui loh chuan Pathian hnenah i kawltir emaw, i tan a pawimawh lo tihna emaw a ni ang.

I mangan apiang hian tâwp la, ṭawngṭai rawh. I mangan apianga i ṭawngṭai hian manganna tur i nei tlem tihna a ni. Manganna hian engmah a ti danglam thei lo. Mahse ṭawngṭaina erawh chuan engkim a tidanglam thei a ni.

Isua Tlang chunga a thusawi khan, "Jentail ten chung zawng zawng chu an zawng thin a ni. Chung zawng zawng chu in mamawh tih in Pa vana miin a hre reng a ni. A ram leh a felna chu zawng hmasa zawk rawh u, tichuan, chung zawng zawng chu a pek belhchhah dawn che u nia," a ti. Matthaia 6:32-33.

 I thil dah pawimawh hmasak a dik chuan Pathian chhânna chu "aw" tih hi a ni. I thil ngaihsak hmasak chu a ram tana nun a nih chuan i mamawh zawng zawng chu a pe dawn che a ni. 

"He ṭawngṭai chhânna hi Pathian hnen aṭangin ka nghak," i ti a ni maithei e. Pathian i nghalâk nge, a nghâk zawk che? I duh zawng leh i dah hmasak zawk finfiah a duh pawh a ni maithei. Chhânna a pek hma che a i tana pawimawh hriat hmasak a duh a ni.

Bible thutiam chu, "Dik taka awmte lakah chuan thil ṭha reng reng a ui lovang," tih a ni (Sam 84:11).

Isua tana i nuna a lam i hawia amah i zawm tlat chuan i thinlung duh zawng pek che a inring reng a ni.

Pathian chuan a ṭhatna chu a ui ngai lovang!

Ngaihtuah zui atan.

Tunah khan i nuna hna thawk thei lo kha eng thil nge? Entirnan, Pathian tan eng ang taka tam nge hun i hman ṭhin? Social media leh TV en nana i hun hman nen a inthlauh dan eng nge?

Pathian ram chu i dah pawimawh hmasak ber a nih chuan i duh zawng chu eng thil nge ni ang?

Chatlak lova i tawngtai fan fan theihna tura vawiina i tih tan theih tur thil hote eng nge ni ang?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...