Friday, October 3, 2025

KHAWI LAMAH NGE I RILRU I DAH?

 Harsatna Paltlang Tura Pathian Dil


By Rick Warren

— October 03, 2025



“A tâwp berah chuan unaute u, a dik leh zahawm apiang, a fel leh thianghlim apiang, a duhawm leh thangmawi apiang, a ṭhata, fak tlâk a nih phawt chuan, chûng chu ngaihtuah rawh u.” [Philippi 4:8]


Thil dik ena insawrbing hi a harsa tial tial. Bible chuan, “A tâwp berah chuan unaute u, a dik leh zahawm apiang, a fel leh thianghlim apiang, a duhawm leh thangmawi apiang, a ṭhata, fak tlâk a nih phawt chuan, chûng chu ngaihtuah rawh u,” a ti thung si [Philippi 4:8]. 


Kan rilru thlak danglam a ngai. A awmzia chu tih dan thar [habit] eng emaw i chin a ngai tihna a ni. 


Nitin maiin i rilru hi dawt chi hrang hrang hrilh hriat reng a ni a. Advertisement leh social media-te chuan i ngaihtuah loh chuan, i inchei loh emaw eng emaw i tih loh chuan awmzia i nei lo an ti. I ṭhanlen ang zelin, lehkha i thiam loh emaw infiamna eng emawa i ṭhat tawk loh emaw chuan hlutna i nei lo tiin an sawi. Khawvel hi dawt muhluma khat a ni a, thil tam tak chu I awih ve hial ang. Mahse an dik miah lo. Chubakah chuan rilru hahna leh buaina an siamsak zawk ngar ngar ang che. 


I rilrua chutianga dawt leng vel nuai nuai nawr liam dan chu thutak a ni. Thutak chu hei hi a ni, Pathian chuan a hmangaih che. A tan hlutna i nei. Isua chuan, “Thutak in hria ang a, thutak chuan a zalêntîr ang che u,” tiin a sawi [Johana 8: 32]. 


Chu zalennaa mi a awm chuan nun thar a nei tihna a ni – nunna thar neih hi a pawimawh! Chu dinhmun thlen theih dan kawng awlsam ber chu nitin Pathian Thu nena hun hman chu a ni. Chu chu miin siamtharlehna a channa hmun pawimawh ber chu a ni bawk. 


Chu chu i thei lo nia i ngai a nih chuan social media, tv en nan, chanchin thar ngaihthlak nan darkar engzat chiah nge i hman han ngaihtuah let teh. I rilru chu dawt zawka i chhunkhah fo chuan engtin nge rilru hrisel chu i neih theih tehlul ang?  


I thil hriat zawng zawngte kha an dik kher lo. I thil chhiar zawng zawngte pawh an dik vek lo. Nangmah leh nangmah i inhrilh zawng zawng pawh kha an dik bik vek chuang lo. Nitin Bible atangin thudik chu zawngin Pathianin i hnena a sawi duh chu i zawn a ngai. I chungchang a sawi chu a rintlakin a thutiam i hnena a pek che chu a pawm tlak bawk. 


Thudik chauh lam ena i rinna a awm chuan engnge lo thleng ang? 


Bible chuan hetiang hian a sawi, “Tichuan, mihring hriat sên rual loh Pathian thlamuanna chuan, in thinlung leh in rilrute chu Krista Isuaah chuan a vênhimsak ang che u,” tiin. (Philippi 4:7).


I rilru leh ngaihtuahnate chu hahdam taka an awm i duh em? Chu chu nun thar mitinten kan mamawh em em a ni: rilru hahna tlem zawk leh hahdamna chu. Nun thar nei tur chuan vawiin hian Pathian Thu buaipui hmasa ang che. 

Ngaihtuah zui atan. 


• Nitina i thil tih ṭhin Pathian Thu chhiarna atana thlak ṭha zawk em em chu eng nge ni? 


• Engtin nge i thil hmuh leh hriat chu thudik nge a niha dawt zawk tih i       hriat theih ang? 


• Kum eng emawzat nangmah leh nangmah dawt i inhrilh ṭhin chu eng nge ni? Engtin nge Bible thil sawi chu a dik bik? 


[ Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...