_Pathian Aw Hriat_
- Rick Warren
- October 4, 2025
_"I thiltih zawng zawngah leh i kalna apiangah Pathian aw ngaithla zel rawh. Amah chu i kawnga hruai zeltu tur che a ni." _ (Thufingte 3:6, MSG)
Luka 8:8-ah chuan Isua amah zuitu mipuite hnenah chuan heti hian a ti, _"Ngaihthlakna tura beng nei apiangin ngaithla rawh se"_ (NIV). Sawi tur a nei a - anni tana thu pawimawh tak a ni.
Hei hi i tan pawh a ni. Pathianin i hnenah thu sawi a duh - i hun pe a i lo ngaihthlaksak a ṭul a ni.
Pathian aw i hriat chuan a chhungkaw zinga mi i ni tih lantirna a ni. Pathian aw i hriat ngai loh chuan amah nen in inbe ngai lo tihna a ni, a chanchin i hre ve mai chauh a; amah i hrechiang tak tak lo tihna a ni. Mahse Pathian i biak chuan - a hnena thu i sawi a a aw i ngaihthlak chuan - inlaichinna mumal tak in nei tihna a ni.
Pathian aw i hriatin thil tihsualna lakah a veng bawk che. Pathian aw i ngaihthlak chuan i kalkawnga khuar lai te, thang awm te, leh kawng kawi awmte a kawhhmuh zel ang che. Pathian aw i ngaihthlak a duhzawnga i tih chuan i hun, tha, beidawnna leh hlawhchhamna lakah i inveng thei ang.
Thufingte 3:6 thu hi The Message chuan heti hian a letling, _"I thiltih zawng zawngah leh i kalna apiangah Pathian aw ngaithla zel rawh. Amah chu i kawnga hruai zeltu tur che a ni." _ Pathianin hlawhchhamna emaw thil tihsualna emaw hrilhhaina emaw lak ata min chhanchhuah zat hi ka chhiar seng lo. A chang chuan ka hnenah thu kam hnih khat chauh a sawi - "Ti suh," "Aih," "En rawh" ti tein. Chung chu sawi ṭul a tih te an ni.
Pathian aw ngaihthlak hian hlawhtlinna te a thlen bawk ṭhin. He khawvelin hlawhtlinna a tih ang erawh ka sawi tum a ni lo - hausaka emaw larna emaw hmingṭhatna emaw ang te hi. Hlawhtlinna chu Pathianin a siam chhan che i tihpuitlin kha a ni. Hlawhtlinna chu Pathian duhzawng anga kan nun aṭanga hlawhtlinna awm hi a ni.
Sam 32-ah chuan Pathianin heti hian min tiam, _"Fing taka awmtir chein i kalna tûr kawng chu ka entir ang chia: Ka mita en reng chung chein rem ka ruatsak zel ang che."_ Pathianin kawng ṭha bera hruai che a intiam tih hria la. I tana a ruahmanna kha midang tana a ruahman nen a inang lo - a chhan chu midang tana ṭha ber kha i tana ṭha ber anih ve kher loh vang a ni.
Isuan heti hian a ti, _"Ka beramten ka aw an hria; anni ka hria a, annin min zui a ni." _ tiin (Johana 20:27, NLT). Vawiin hian i Beram Vengtu ṭha aw ngaithla rawh le.
Ngaihtuah zui atan.
I kalkawnga hlauhawm lak ata a venhim nan che engtikah khan nge Pathianin i hnenah thu a sawi? A aw i ngaithla em? Engnge a rah chhuah?
Tunah eng kawngah nge Pathianin a hruai che?
Pathian aw hi eng angin nge i lo hriat?
[Lettu: Mapuia Fanai]
No comments:
Post a Comment