_Pathian Aw Hriat_
- Rick Warren
- October 5, 2025
_"In nuna sual leh bawlhhlawh zawng zawng chu dah bo ula, in thinlunga Pathianin thu a tuh chu tlawm takin pawm rawh u, in thlarau chhandamna theihna a neih avangin."_ (Jakoba 1:21, NLT)
Mobile phone hi kan awmna hmun a zirin signal a man chakin a man chak lo a ni tih kan hre ṭheuh. Chutiang chiah chu Pathian aw kan hriat dan hi a ni. A aw i hriat chian theihna tur chuan i dinna hmun a dik a ngai.
Pathianin min biak a duh a, mahse a chang chuan a aw hre turin kan lo dawngsawng ṭha ṭhin lo emaw kan hre duh lo emaw a lo ni ṭhin. Kan thiltih duhzawng kan lo thlang fel tawh ṭhin a lo ni zawk thei bawk - dik taka kan sawi chuan Pathian duhzawng ni lo kan lo ti fo ṭhin. Kan rilru hian a hlat apiangin a aw hriat a harsa a, a duhzawng anga nun a harsa ṭhin.
Mahse Pathian aw i hre duh tak zet anih chuan engin nge a aw i hriatna dal tih i hriat a ṭul. Pathian aw i hriat lohna tura daltu che rilru lamah pathum a awm:
*Chapona:* Pathian mamawh lo ni a inhria a, mahni a ke pen i thlan chuan Pathian aw i ngaithla lo tihna a ni. Pathianin i hnenah eng emaw sawi duh a neih te kha chaponain a dal vek a ni.
*Hlauhna:* Mi tam tak chuan Pathian aw an hlauh avangin a aw an hre thei ṭhin lo. Mi ṭhenkhat chuan Pathian aw hriat a, a hruaina hnuaia awm hi sakhaw ruhkawl mi nihnaah an ngai.
*Khakna:* Natna, huatna, ngeina te i thlah loh chuan i thinlung a sak tial tial ang a, chu chuan Pathian aw hriat a tiharsa ṭhin. Thinlung sak chuan Pathian hmangaihna lak ata thlengin min inventir thei.
Tunkar emaw kum tam liam taah emaw khan na taka hliam i ni a, chu chuan a la chelh reng che a ni thei. Chu i natna chu i thlah a ngai tawh a ni tih hrilh che ka duh. Midang tan ni lovin, i tan a ni. Huatna hi hun kal tawh a mite kan rilru min hliamsak kan phalna avanga mahni kan intihnatna a ni. Pathian aw i hriatna daltu chapona, hlauhna leh khakna i lak bo a, a siam chhan che tipuitling tura i nun a ngai a ni.
Jakoba 1:21-ah chuan heti hian kan hmu, _"In nuna sual leh bawlhhlawh zawng zawng chu dah bo ula, in thinlunga Pathianin thu a tuh chu tlawm takin pawm rawh u, in thlarau chhandamna theihna a neih avangin."_ (Jakoba 1:21, NLT)
"Tlawm taka pawm" tih awmzia chu i chapona paih bo a mahni a tihtum bansan hi a ni. Hei hi Pathian- nangmah siamtu, hmangaihtu leh i hnena thusawi duhtu tana i rilru leh thinlung i hawn dan chu a ni.
Ngaihtuah zui atan.
Engtinnge Pathian aw i hriat, emaw a hruaina i hriat theih? Engtinnge i hnenah thu a sawi?
I nuna "sual leh bawlhhlawh" dah bo a Pathian aw hre turin eng danglamna nge i siam ngai,?
Engvangin nge Pathian aw hriat hi sakhaw ruhkawlna nen inanga kan ngaih fo?
[Lettu: Mapuia Fanai]
No comments:
Post a Comment