_Harsatna Paltlang Tura Pathian Dil_
By Rick Warren
— September 18, 2025
“Ka hming pu ka mite chuan inngaitlâwma an ṭawngṭaia, mi zawna, an awm dân sualte an hawisan chuan, vân aṭangin ka lo ngaithla ang a, an sualte ka ngaidam ang a, an ram chu ka tidam leh ang.” [II Chronicles 7:14]
Pathian chu chapona thinlung nena nawr chet chi a ni lo, tlawm taka inpuanna zawkin a khawih che.
Pathian chuan mi tlawm a chhang ṭhin. Mi tam tak chuan an sualna an pawm hreh ṭhin, mahse Pathian chuan i sualna zawng zawng chu a lo hre lawk vek! I nuna i thil lo tihsual tawh zawng zawngte chu a hre tlang vek. A hnena i inpuan chu a duh mai a ni. Tlawm turin a duh che.
Pathian hmaa i tlawmna chu hremna hmangin a chhang lovang che. Ngaihdamna, lainatna leh malsawmna zawkin a lo dawngsawng ang che. Pathian chuan a pawhhniam ngawt lo vang che – i chapona zawk chuan a pawt hniam ang che. I sualnate chu i pawm chiah chuan Pathian chuan ngaihdam nghal mai che a chak che. Mi tlawmte hnenah lainatna a lantir ṭhin.
Grik thumala “inpuang” tih chu _homologeo_ tih a ni a. _Homo_ tih aṭanga lak niin “inang” tih leh _logeo_ “sawi/hrilh” tihna a ni. Thumal _homologeo_ tih awmzia chu thil inang sawi tihna emaw inthurual tihna a ni. Pathian hnenah chuan, “I dik zawk. Ka tisual a ni. Ka dikna ka sawi dawn tawh lo. Ti tawh suh min ti a, ka la ti zui zel a ni. A dik lo a ni. I laka helna mai a ni e,” tihna a ni.
Daniala chuan, “Kan lo sual a, kan lo tisual ta a ni” – chutah chuan a tawp mai lo: “Kan sual a, kan ṭha lo va, thil dik lo kan ti a, i thupêk leh i dânte kan hawisan a. Kan lal te, kan hotu te, kan pa te leh hnam pum hnêna i chhiahhlawh i zâwlneiten i hminga thu an sawi chu kan ngaithla duh lo va. Lalpa, nang chuan dik takin thil i ti ṭhîn a, keini zawngin mahni kan intimualpho ta a nih hi; Judai rama la awm te, Jerusalema awm te, an sual vânga ram tin ram tanga i tihdarh Israel-te nên angkhat vek kan ni,” tiin. [Daniala 9: 5-7]
Daniala inpuanna kha a mumalin a chiang hle, chutianga i tih ve chu a ngai. I sualna chu ngaizam mai suh, chung sualnate chu hre chiang turin buai lutuk emaw chapona avanga en kan mai chu a dik lo. Pathian chuan che thlap thlap turin a duh che, a chhan chu i tihnawn tawh loh nan hre chiang ang che.
Israel faten Pathian malsawmna an phu lo nia a hriat khan Daniala chuan Pathian ang chhungah a tlu lut a nih kha. Tlawm taka Pathian hmaa i sual i puang a nih chuan i duhna te chu Pathian hnenah i thlen tihna a ni. I chak lohna te chu i pawm tihna niin Pathian zahngaihna chu i dil tihna a ni. Pathian chhanna chu khawngaihna a ni ngar ngar.
“Ka hming pu ka mite chuan inngaitlâwma an ṭawngṭaia, mi zawna, an awm dân sualte an hawisan chuan, vân aṭangin ka lo ngaithla ang a, an sualte ka ngaidam ang a, an ram chu ka tidam leh ang.” [II Chronicles 7:14]
Ngaihtuah zui atan.
• I nuna eng sual kha nge tlawm taka Pathian hmaa puan ngai nia i hriat?
• I eng sualna lai kha nge Pathian hmaa i tlawmna chuan a lantir ngai nia i hriat?
• II Chronicles 7: 14 hi engtiangin nge i nunpui ang a, vawiin hian Pathian hmel chu enin engtin nge i inpuan ang?
I tana rahbi thar awm thei chu i nuna Isua pawm chu a ni em?
Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh.
I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e.
Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria.
“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment