Saturday, September 20, 2025

PATHIANIN BIAK CHE A TUM

_Harsatna Paltlang Tura Pathian Dil_

- Rick Warren 
- September 20, 2025
_"Hlau suh ula, chung mipui tam tak avâng chuan zam hek suh u; indona chu nangni indona a ni lo va, Pathian indona a ni zawk si a."_ (2 Chro 20:15)

Ṭawngṭai hi mi pakhat chauhin a duhzawng a sawina a ni lo, inbiaktawnna a ni. I ṭawngṭai hunin nangmah chauh ṭawng suh! I hnena Pathianin thu a sawi hun i siam ve loh chuan Pathian nen inṭhian ṭhatna i siam thei lovang.

Engtinnge i hnenah Pathian thu i sawitir? Bible kaltlangin. I hnenah sawi duh a neih tam tak chu a thuah a awm tawh. Mi tam tak chuan chhinchhiahna eng emaw tak hmanga Pathianin a duhzawng a hrilh an beisei ṭhin. Vanah te khian lo ziak kulh se ka ti ṭhin. Mahse Pathianin a duhzawng te vanah khian a rawn ziak dawn lo, a chhan chu a lehkhabuah a ziak vek tawh: Bible-ah.

Chhinchhiahna zawn bansan la, Bible keu zawk rawh. Inlarna hmuh beisei tawh lovin Bible chang keu zawk rawh. Pathian duhzawng chu Pathian thuah a awm. Bible i chhiar tam poh leh tihtur i hriat belh zel ang.

Lal Jehosaphata khan hmelma sipai hlawm thum lai mai Pathian fa Israel te beih tum a hmachhawn a. Israel fate khan anni hneh thei turin chakna an nei lo tih an inhria. An chakna an rin chuan hneh an ni dawn tih chiang takin an hria. Chuvang chuan puihna dilin an ṭawngṭai ta a. Chutah chuan an hnenah Pathianin heti hian a sawi:

_"'Hlau suh ula, chung mipui tam tak avâng chuan zam hek suh u; indona chu nangni indona a ni lo va, Pathian indona a ni zawk si a . . . He indona hi in beih a ngai lo vang: inzar ula, ding ngawt mai ula, in lama tan LALPA chhandamna chu en reng mai rawh u, aw Juda mite leh Jerusalem mite u: hlau suh ula, zam hek suh u, naktukah bei tûrin thawk rawh u, LALPA chu in lamah a tang si ," a ti a. Chutichuan Jehosaphata chu a hmaia lei siin a kuna; tin, Juda mite zawng zawng leh Jerusalem mi zawng zawng chu LALPA chibai bûkin LALPA hmaah an kun a."_ (2 Chro 20:15, 17-18).

Pathianin, "Ka ngaihsak dawn che u a ni" a tih avanga ram pumpui mai Pathian hmaa bawkkhupa chibai an buk tur chu han mitthla chhin ve mah teh u.

Jehosaphata Pathian hmaa inpumpek a a ṭawngṭaina hi i entawn ber lo ni rawh se. Hlau lo la zam suh! Pathian indona a ni a, aman hma a la mai ang. I awmnaah khan a rawngbawl tlat la. Nghak la, Pathian thiltih lo thlir rawh.

Pathianin i tan thutiam ropui tam tak a nei. Mahse Bible keua i chhiar hma loh chu i hre lovang.

Ngaihtuah zui atan.

Bible i chhiar laiin rilru pek i harsat em? Anih chuan engtinnge Pathian thu i chhiar laia tibuai thei thilte i tihtlem ang?

Indona i hmachhawn mek kha nangma indona ni lovin Pathian indona a ni tih i rin khan engtinnge i hmachhawn dan i thlak ang?

Vawiin hian engtinnge Pathian thutiam hrilh nawnna hmangin midangte i fuih ang? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...