Friday, July 18, 2025

LEIBAT MAN TO

_Thilmak I Beisei Laiin_

By Rick Warren
— July 18, 2025
“Sum ngaina mi ni lo ula, in thil neih tâwkah lungawi rawh u.” [Hebrai 13:5]

Nitin mai hian kan lehkha dawnna bawm [mail box] ka hawn apiangin credit card min pek tumtu ka tawng ṭhin. Mahse chutianga thil zuartuten an sawi tel mang hauh loh chu hei hi a ni: “Leiba.” Chung aiah chuan “thil pek dan awlsam” tih vel a ni daih. Ṭhiante u, pawisa awlsam tih velte hi a awm tak tak miah lo a nia. 

Thudik chu hei hi a ni zawk, leibaah chuan thil hlauhawm a awm – leiba neih reng chu thanga mahni leh mahni inawh ang a ni palh thei. 

Leiba nen i khawsa a nih chuan i thil neih piah lamin i khawsa tihna a ni zawk ang. Living Bible chuan, “I leiba pek tur chu tikhawtlai suh. Tunah khan i pe thei mai a nih chuan ni dangah ti miah suh ang che,” tiin a sawi [Thufingte 3: 27-28].

I neih bak piah lamin i khawsa tih chu engtin nge i hriat ang? Heng hi a hriat dan awlsam a ni: I nitin mamawh leina te chu a thlabia i rul thlap thlap lo a nih chuan i senso chu i thawh chhuah chuan a khuh zo lo tihna a ni thei, chu chuan buaina pathumah a hruai thei che: 

Leiba nena i khawsakna chuan i lungawi tawk lo tihna a ni thei. Tute emaw chuan an thawhchhuah piah lama leiba an dap tel fo a nih chuan an theih bakin an khawsa tihna a ni a, chu mi awmzia chu an duhzawng chu nghah hlek an thiam lo tihna a ni. “Tunah ka neih ngei ngei a ngai. Ka nghak thei lo!” an tihna ang deuh a ni. Chu chu puitling lo zia a ni. I puitling a nih chuan duhzawng tihhlawhtlinna tur chu i nghak khawtlai thei ang. Nangma theihna ngeia i neih theih hma chuan i hnar tur a ni. 

Tun lai khawvela kan buaina tam tak hi kan nghah theih loh vanga kan buaina an ni. Sum leh paia buaina an ni ngawr ngawr lo. Mipat hmeichhiatna chungchangah ṭhenkhat an insum thei lova, an rilru ngaihtuahna an thunun thei lo bawk. Engkim kan duh vek a, tunah ngei kan duh leh nghal a. 

Mahse Bible chuan kawng dangin min hrilh thung: “Sum ngaina mi ni lo ula, in thil neih tâwkah lungawi rawh u,” tiin. [Hebrai 13:5]

Leiba hmanga khawsa te chuan hun lo la awm tur an lo puk lawk a. Mi tute emawin leiba an nei a nih chuan an hmalam hun engtik niah emaw chuan an leiba te chu la pe tlak thei turah an inngai mai tihna a ni. 

Mahse Pathian chuan, “A tûk lama thil lo awm tûr chhuang suh, Chumi ni chuan eng nge a rawn chhuahpui dâwn i hre si lo” tiin a sawi. [Thufingte 27: 1]. Pathian chauhin hmalam hun a hria. Vawiin hian naktukah i leibate chu pe thei mai turah inngai ngawt suh ang che. 

Leibaa khawsak chu hun lo kal zelah a buaithlak zek thei. Zir chianna eng emaw zatten an tarlan dan chuan miin [credit card] a baa thil an lei hian a tira lei an tum aia tam an leiin ba pawh an ngah sawt zel an ti. 
Pawisa hman chu thil nuam tak a ni thei, rei lo te atan chuan i khawvel pawh a vawrh kan dawrh thei. Mahse i sum neih ni hauh lo i lo hman chiam chuan nuam i tihna chuan rei a daih ngai miah lo vang. I hriat hmain i leibate chuan an lo pan che ang a, i hnual leh rawih rawihin leiba rit tak chuan a delh fo ang che. 

Pathian chuan leibain a delh beh nun hmang turin a duh lo che – A ruahmanna chu chu aia tha fe chu a ni. Hahdam tak leh zalen taka nung turin a duh che, leibain a delh beh loh, amaha i mamawh phuhrukna neia nung turin a siam che. 

Ngaihtuah zui atan. 

I nunah khan mamawh i neih chang chuan i mamawhte nei tur chuan khawi lam nge i hawi ber? 

Vawiin hian engnge i mamawh? Pathian chuan i thil mamawh te pe tur chein amah chu engtin nge i rin theih ang? 

Pathian chuan a Thu hmanga a thutiamte chu a hlen ngei dawn a ni tih engtin nge i hriat ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...