Saturday, July 19, 2025

BATNA THANG LAK ATA CHHUAHNA

_Thilmak I Beisei Laiin_

- Rick Warren 
- July 19, 2025
_"Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a."_ (Galatia 6:9)

Ba tam tak neih hi a chang chuan khuarkhurum mawng nei lova tla ang mai hian chhuah ngaihna awm lo ang a ni ṭhin. Mahse Pathianin i pil thuk zel a duh lova, sum leh pai kawngah zalenna i neih a duh a ni.

Ba laka i chhuah mai ni lo ba i neih leh ngai tawh loh dan tur kawng ṭhenkhatte thlir ila:

*1. Tunah khan ba nei tawh lo turin intiam rawh:* Eng kawng pawh zawh dawn ila a ṭantir, hmalakna hmasa ber hi a har ber a ni fo ṭhin! Ba i neih chuan ba nei tawh lo turin i ba zawng zawng rul tura i intiam/tum phawt a ngai. Chumi tur chuan inpekna, inthununna, tih hram hramna, nungchang dik, inpekna leh lungawi zung zung lohna neih a ngai. Tumahin thawklehkhatah ba nei lovin an awm thut thei lo. Ba lak ata chhuak tur chuan tum a ngai. Chuvangin vawiin hian ba nei lo turin intiam rawh.

*2. Pathian hnenah pe la, i tan dah bawk rawh.* Ba lak ata zalen i tum reng lai pawh khan sawma pakhat Pathian hnenah pe reng la, i tan dah ṭha ve hlek bawk rawh. I nunkawng eng berah emaw Pathian malsawmna dawn i duh chuan chumi kawngah chuan amah i dah hmasak ber a ngai. Bible chuan heti hian a ti, _"A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia"_ (Mat. 6:33). Sum leh paiah Pathian malsawmna chan i duh chuan i sum leh lai deh chhuahnaah amah i dah hmasak ber a ngai. Chu chu sawmna pakhat i pek leh i dah ṭhat khan a ni.

*3. I neih, bat, thawh chhuah zawng zawngte ziak chhuak rawh.* Bible chuan heti hian a ti, _"Finna in chu sak ani a, Hriat thiamnain tihngheh a ni."_ (Thufingte 24:3). Sum chungchanga fel taka enkawl tur chuan a lokalna leh i hman ralna i hriat a ṭul ang.

Mi ṭhenkhat chuan pawisa hi a ṭawng thei a ni an ti, mahse a ni lo. Ngawi rengin a kal bo mai zawk a ni. Thla tawpa a lo thlenin, "Khawiang nge kan pawisa zawng zawng kha a kal bo le" tih mai a awl ṭhin. Mahse sum hman ral dan tur i duanin, a duh duhnaa kal mai lovin i sum kalna tur fel takin i hrilh ang. Sum hman ral dan tur ruahmanna fel tak neih hi a pawimawh a ni.

*4. Ba laka i chhuah theih nan ruahmanna ṭha tak  nei rawh.* Tihpalh thil thuin ba lak ata i chhuak lovang; ruahmanna i neih a ngai. Bible chuan heti hian a ti, _"Ruahmanna ṭha leh thawhrimna chuan hausakna a thlen ṭhin"_ (Thufingte 21:5, NLT). Ba rul leh dan tur ruahmanna ṭha i neih loh chuan fuihtu tur che i zawn a ngai. I dam loh huna doctor i pan ang chiah khan sum leh pai lama mithiam emaw ṭhian ṭha tak emaw, pui theitu tur che i zawn a ngai a ni.

*5. Ba neih belh tawh suh.* Ba lak ata chhuah i tum mek laiin ba dang neih belh tawh suh. Hemi kawnga i tana tihdan awlsam ber mai chu i credit card (a baa sum hman theihna) dah ṭhat kha a ni mai thei. Chumi kawnga ke i pen mek laiin he thudik hi lo hre reng la: _"In thil neih chhun chungah te chuan lungawi rawh u."_ (Heb. 13:5).

*6. Bei hram hram rawh.* Ba lak ata chhuah hi thil awlai a ni lo. Inthununna, tha pek, leh inpekna a ngai. I beih chawt a ngai tiin kan sawi thei bawk ang. Bible chuan heti hian a ti, _"Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a."_ (Galatia 6:9)

Ram ei leh barin nghawng a neihah thuneihna i nei lo. Mahse engzat nge i pek, i dah ṭhat, i hman ral tihah erawh thuneihna i nei. Ba lak ata chhuah a, ram ei leh bar chungchangah engpawh thleng se Pathian duhzawnga sum enkawl i zir a ngai a ni.

Ngaihtuah zui atan.

Engtinnge sum leh paiah Pathian i dah hmasak? Chutianga i ti lo anih chuan engtinnge i tihdanglam ang?

Hebrai 13:5-ah chuan Isua zuitute a fuihna kan hmu, _"In thil neih chhun chungah te chuan lungawi rawh u." I nunkawng khawiah ber nge i lungawi? Khawiah nge i lungawi loh? I lungawi lohna lai te Pathian hnenah thlen la a puihna dil rawh.

Engtikah nge a harsat lai pawha thil dik tih hram hram avangin "malsawmna rah" i seng?

[Lettu: Mapuia]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...