Sunday, July 20, 2025

ṬHANG LIAN TURIN KHAW ṬHA I MAMAWH RENG LO

_Thilmak I Beisei Laiin_

- Rick Warren 
- July 20, 2025
_"In rinna fiah anih hunin i chhelna khan ṭhan lenna hun a nei. Chuvang chuan ṭhantir rawh, i chhelna chu a lo puitlin hun chuan mi famkim niin engmah mamawh i nei lovang."_ (Jakoba 1:3-4, NLT)

Khaw ṭha leh boruak thiang hnuaiah hian a ṭhan len theih - mahse harsa i tawh laiin zung i kai thuk zawk tlat thung.

Pastor ka nih angin mi tam tak hnen aṭangin an dinhmun a ṭhat lai aiin an inṭhen lai, dam loh lai, hna chan lai, emaw chhiatna eng emaw an tawh laiin an ṭhan len nasat zawk thu ka hria. Pathianin amah an hnaih leh zual nan leh an puiltin nan harsatna te a hmang ṭhin a ni tih an hmu thiam tlat.

Bible chuan heti hian a sawi, _"In rinna fiah anih hunin i chhelna khan ṭhan lenna hun a nei. Chuvang chuan ṭhantir rawh, i chhelna chu a lo puitlin hun chuan mi famkim niin engmah mamawh i nei lovang."_ (Jakoba 1:3-4, NLT)

Ṭhan lentir rawh! I harsatnaah Pathian hlat mai lova i pawh hnai zawk chuan chhelna, engkim hmachhawn tura thuamtu che- nunziaa chakna petu che leh tifamkimtu che chu i nunah a lo ṭhang lian ang.

Natna hi ṭhan lenna hmanraw ṭha tak a ni. He thufing an sawi ṭhin hi a la dik reng mai: tawrhna lo chuan hlawkna a awm lo. Thil chin fel dan rang leh awlsam hi kan duh ṭhin. Damdawi emaw, kan thil zir emaw, lehkhabu te emaw danglamna thlen turin natna tel lo nise kan ti ṭhin. A kalkawnga harsatna te tawk duh miah si lovin a rah chhuah, puitlinna nun erawh neih kan duh em em thung. Mahse chutiang chuan a thleng lovang! 


Pathian thu zir mi J.I. Packer chuan heti hian a sawi, "Pathianin natna benvawn leh kan chak lohna te hi, kan tawrhna tinreng te nen kan nun chherna hmanrua atan a hmang thin. Kan chakna atan nitin Isuaa kan innghahna a tinghet zual ṭhin. Kan chak lo ni a kan hriat poh leh Isuaah kan inghat a, kan thawk rim zual poh leh thlarauah kan ṭhang lian chak ṭhin."

Tuna tihnual em emtu che kha Pathianin i ṭhanna atana a hman mek a ni.    

Engtinnge Davida khan khang hla zozai mawi em em leh thiltithei em em te kha a ziah theih? A chhan chu beram vengtu a nih lai leh lal a nih hun thlenga mal ngawih ngawihna te, ngaihsak lohna te leh dik lohna a paltlang lai te khan a kiangah Lalpa a awm reng a ni tih Davida khan a hre tlat. A nat ber lai khan a hla mawi ber kha Davida khan a ziak tlat a ni.

Natna leh harsatna nasa tak i paltlang laiin i nunah ṭhan lenna a lo thleng ang, kawng danga i neih theih ngai loh tur kha. Chumi kalkawng chuan mi famkimah a siam hauh lovang che, mahse Krista anna kawngah a ṭhan lentir ang che. I harsatna karah Pathiana rinna i nghah tlat chuan chhelna a pe ang che ang a, a thlamuanna leh chawlhna a pe ang che.

Ngaihtuah zui atan.

I thlarau nun ṭhan lenna kawngah duhthlanna neiin i inhria e? Engvangin?

Harsatna nasa tak i paltlang hnua Isua anna kawnga i ṭhan lenna kawng khat engnge le?

Engvangin nge chhelna hi neih a ṭul?
[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...