Saturday, June 7, 2025

I NUNA PATHIANIN HNA A THAWH KHA LAWM RAWH

_Tihdanglam Tawh_

- Rick Warren 
- June 07, 2025
_"Pathian fak ula, a hming fakin zai rawh u; a hnenah chuan hla sa ula . . . a hming chu Lalpa a ni."_ (Sam 68:4, ESV)

Pathian nena inpawlna dik tak nei leh tur chuan tuna i nun kha i nin a ngai a, i sual te i kalsan a, i nun Pathian thuhnuaia i dah a ngai. Tichuan i nuna Pathianin thil a tih te i lawm thei ang.

Isuan fapa tlanbo tehkhinna a sawiah khan a pain a chhan dan kha lo chhinchhiah a pawimawh hle: _"Chutichuan hla taka a la awm laiin a pain a lo hmu a, a khawngaih em em a . . . Nimahsela a pa chuan a bawihte hnenah, ‘Puan tha ber kha han la thuai ula, han sintir rawh u; a kutah zungbun te, a kehphahah pheikhawk te buntir rawh u; sebawng no thau tak kha han la ula, talh rawh u, hlim takin i ei ang u'"_ (Luka 15:20, 22-23).

Fapa tlanbo pa kha i Pa vana mi ang khi a ni. Engpawh lo ti tawh mahla Pathian hnena i kir leh phawt chuan a hmangaihnain a lo kuangkuah ang che. A ṭha ber i tana hlanin heti hian a sawi, "Engkim ngaihdam a ni! Puan han la ula. Pheikhawk kha hana rawh u. Ruai i kil ang u! Ka fapa ka hnenah a lo let leh anih hi" tiin.

Thiam loh chantir tur ni lovin lawmna dawng turin a ni i lo haw. Pathian chu lawmnaah chuan amah fakna kaltlanga i tel ve a duh a ni.

Heti hian thlarau lama tihdanglam i nihna i lawm thei ang, heti hian sawi la, "Lalpa ka lawm e. I khawngaihna, hmangaihna leh ṭhatna avangin ka lawm e. Ka fak a che" tiin.

Sam 68:4-ah chuan heti hian kan hmu, _"Pathian fak ula, a hming fakin zai rawh u; a hnenah chuan fakna hla sa ula . . . a hming chu Lalpa a ni si a."_ (ESV)

I nuna danglamna lawmna ṭha ber chu Pathian hnena fakna hla sak a ni. A hnena fakna hla i sak khan i nuna Pathianin hna a thawh lawmna leh a hnena lawmthu sawina hun a pe che a ni.

"Mahse zai thiam ka ni lo" i ti a ni mai thei. Chanchin lawmawm hrilh tur che ka nei: Bible-in mawi taka zai turin a ti kher lo che. Hlim taka zai turin a ni a tih zawk che. Chu chu i thei a ni! Tute pawh hi hlim takin kan zai thei a ni.

Tunge anih avang chauh ni lovin i nuna danglamna a thlen avang pawh khan Pathian fakin zai rawh.

Ngaihtuah zui atan.

I nun a hnawk viau lai khan engtinnge he leia i pa nena in thil tawn tawh khan Pathian laka i beiseinaah nghawng a neih?

Engpawh tiin khawi kawng pawh lo zawh tawh mahla Pathian hnena i kir phawt chuan a lo lawm che a ni tih i hriatin mak i ti em? Engtin?

Engin nge Pathian hnena lawmna vanga fakna i hlan tur dal ṭhin? Emaw, engin nge hlim taka Pathian fakna kaltlanga chibai i bukna a dal?

Isua Krista kaltlanga Pathianin chhandamna min pek a tiam hi i ring tawh em?

Isua hnena inhlan tura i inpeih chuan heti hian ṭawngṭai rawh le:

"Isu, nang ka rin phawt che chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, ka Lal leh Chhandamtu  i ni tih ka pawm e. Ka sualte ka puan a nang ka rin che chuan chhandam ka ni ang tih min tiam a. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Vawiin hian nun zawng i tan ka hlan e.

"Phut let nei lova min hmangaih avangin ka lawm a. Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...