_Pathian Nena Inzawm: Lalpa Ṭawngṭaina_
By Rick Warren
— May 04, 2025
_"Pain a fate a khawngaih ang hian, LALPA chuan mah tihtue chu a khawngaih ṭhin."_ (Sam 103:13)
Pathian chu mi ngaihsakna, hmangaihna leh lainatna neitu Pa a ni. Bible chuan Sam 103:13-ah heti hian min hrilh, _"Pain a fate a khawngaih ang hian, LALPA chuan mah tihtue chu a khawngaih ṭhin."_ Lainatna nen i nunkawng engkimah a ngaihsak che.
Zirtirte khan Pathian khawngaihna nasa takin an tawng. Zirtir tam zawkte kha sangha mana eizawng an ni a. Ni khat chu Isua hova len an den kha Isua chu a chauh deuh avangin lawng hmawr lehlamah a lo muhil a. Thlipui na tak a rawn tlen thut a - thlipui na tak a ni ngei ang zirtirten an hlau em mai.
An lawng kha a vir nasa a, a len dawrh dawrh a ni ber, lawng chhungah tui a lut nasa bawk. Zirtirte kha an chiai hle a, Isua an kai tho a khawvela zawhna pawimawh berte zinga mi an zawt ta a: _"Zirtirtu, min ngaihsak lo em ni?"_ (Marka 4:38, NIV) tiin.
Nang leh kei hian chutiang chiah chuan Pathian hnenah eng lai pawhin kan zawt ṭhin: "Lalpa, doctor lehkha hi i hmu em? Min ngaihsak lo em ni? Sum kan neih tlemzia leh kan pawisa chawi tur a tam si zia hi min hmuhpui em? Min ngaihsak lo em ni? Ka faten an zirlai hi nasa takin an sual a ni tih i hria em? Min ngaihsak lo em ni? He ka hlauhna hian ka rilru a kiansan thei lo tih i hria, min ngaihsak lo em ni?' tiin.
A chhanna chu Pathianin a ngaihsak tih hi a ni. A nihna takah chuan nangmah ai khan a ngaihsak daih zawk. Nangman i inpuih duhna aiin puih che a duhna kha a sang daih zawk. I tana ṭangkai tur nang aiin a hre zawk. A hria a, a ngaihsak che.
Bible chuan heti hian a ti, _"I buaina zawng zawng a chungah nghat rawh, a ngaihsak che avangin."_ (1 Petera 5:7, NIV)
Vana i Pa khian eng ang chiahin nge a ngaihsaka a lainat che tih hria ni la chuan i hmangaih let lo thei lo ang.
Pathian hi i lak ata hla taka awm angin i hria em? A fate ngaihsaktu Pa a ni tih i hriat chian loh vang a ni. Vawiin hian i buaina te Pathian hnenah thlen la - lainatna leh ngaihsakna nen a lo dawnsawn che beisei rawh.
Ngaihtuah zui atan.
Engin nge tibuai ṭhin che?
Chungte chu Pathianin a ngaihsak i ring em? Engvangin?
Pathian hnena buaina thlen tih hi engnge a awmzia?
[Lettu: Mapuia Fanai]
No comments:
Post a Comment