_Pathian Nena Inzawm: Lalpa ṭawngṭaina_
- Rick Warren
- May 05, 2025
_"Pathian, kan dil leh ngaihtuah te aia nasa daih zawka keimahnia hnathawk ṭhintu hnenah chuan chawimawina zawng zawng awm rawh se."_ (Ephesi 3:20, NLT)
Pathian chu Pa nih tlin tak a ni. Eng harsatna pawh a hnen i thlen chuan a lo ching fel thei. Engmah hi theihna a phak chin loh reng a awm lo. A tan dilna te lua emaw lian lua emaw a awm lo.
Nu pakhat hian ṭum khat chu heti hian min zawt a, "Pu Rick, Pathian hnenah ka nuna thil ho te te hi thlen a pawi em? Harsatna lian zual chauh em ni a hnenah ka thlen ang?" tiin. Heti hian ka chhang a, "Ka pi, Pathianin hei chu a harsa mah mah a ni a tih tur ang harsatna i ngaihtuah tawh ngai em? Emaw, hei chu a holam mah mah a ni a tih tur awm chi harsatna i nei em? Pathian chuan a ngaihsak vek asin" tiin.
Engmah hi Pathianin a tih theih loh chin a awm lo. Pa nih tlin tak a ni.
Tunlai social media i thlir chuan la nih tlin lo mi tam tak i hmu ang. TV-a kan hmuh ṭhinah chuan pa te hi nuihza fiamthu ang lek an ni tawh, mi zawng zawng nuihzat an ni. Chutiang pa chu kan tunlai khawvelin pa nihna a vawrh lar chu a ni.
Mahse chutiang pa nih tlin lo lutuk ang chu van i Pa khi a ni ve lo. Bible chuan heti hian min zirtir, _"Pathian tan engmah tih theih loh a awm lo"_ (Luka 1:37, GW). "Theih loh" tih thumal hi ka dictionary aṭangin ka thai chhe daih a chhan chu Pathian dictionary-ah a awm ve tlat lo. Pathian tan engmah tih theih loh a awm lo.
Ka fate an la tet lai khan thil siamṭha tura min tihte kha mak ka ti ṭhin. Engkim hria, engpawh siamṭha thei leh engkim nei thei turah min ngai ṭhin. An lo puitling hnu chuan an pa hian hriatna tlem tak ka nei a, tha ka ngah lo a, pek chhuah tur ka nei tlem a, thiam ka nei tlem a ni tih an lo hre ve ta.
Mahse vana i Pa chuan engkim a ti thei. Ephesi 3:20-ah chuan heti hian kan hmu, _"Pathian, kan dil leh ngaihtuah te aia nasa daih zawka keimahnia hnathawk ṭhintu hnenah chuan chawimawina zawng zawng awm rawh se."_ (NLT)
Duhthusam lian tak tak nei ṭhin mi ka ni a. Hmathlir lian tak tak ka ngah mai - Pathianin ka duhthusam tam tak min puitlintir bawk. Mahse Pathianin heti hian a ti, "Rick, Eng anga nasain nge duhthu i sam ka hre lo; mahse ka tihtawpsak thei che. Ka lian zawk a. Nang aiin duhthusam liam zawk ka nei thei asin."
Nimina thil tih theih miah lo kha vawiin atana thilmak a ni thei. Thil tih theih lohte hi Pathian thiamna em em a ni leh tlat! Pa nih tlin tak a ni.
Ngaihtuah zui atan.
"Pathian tan engmah tih theih loh a awm lo" tih hriatna hian eng danglamna nge a thlen?
Eng chona lian tak nge i lo tawn tawh - emaw i tawn mek- Pathian rinhlelhtirtu che kha?
Chu chona lian takah chuan engtinnge Pathianah rinna i nghah ang?
[Lettu: Mapuia Fanai]
No comments:
Post a Comment