Saturday, May 3, 2025

PATHIAN HI PA ANGA HRIAT TUM RAWH

Pathian Nena Inzawm: Lalpa Tawngtaina

- Rick Warren 
- May 03, 2025
_"Nangni chuan hetiang hian tawngtai rawh u :- ‘Kan Pa vana mi, I hming zahawm rawh se.'"_ (Mat. 6:9)

Thuthlung Hlui hun, kum sang chuang hun chhung inziaknaah hian Pathian hi "Pa" tiin vawi sarih chiah an ko. Mite khan Pathian hi Pa angin an en lo. Pathian an hmuh dan a dang - Siamtu angin, Engkimtithei angin, ldt. Mahse Pathian hi Pa angin an ngai lo tlat. Tichuan Isuan a lokal a, heti hian a rawn sawi a, _"Nangni chuan hetiang hian tawngtai rawh u :- ‘Kan Pa vana mi, I hming zahawm rawh se.'"_ tiin (Mat. 6:9)

"Ka Pa tiin ko ru" Isuan a rawn ti a ni.

Isuan Pathian sawi nan "Pa" tih hi vawi 150 aia tam a hmang. A hun laia mite tih dan an lo takin a rawn ko a ni. Pathian hi lal nunrawng tak a ni lo a. Vanlam police a ni hek lo. Mi thah nuam ti mi a ni lo a. Chhiatna thlentu a ni hek lo.

Mihring zawmna nei, nangmah nena inlaichinna neih duh Pathian a ni.

Harsatna pakhat chiah a awm. Mi tam tak tan chuan "Pa" tih hi thil ṭha lo tam tak hriat chhuahtirtu thumal a ni tlat. Mi tam tak chuan heti hian an ti, "'Kan Pa vana mi'? Pathian hi ka pa ang anih chuan, ka duh tawp lo mai." tiin.

Thudik chu hei hi a ni, pa ṭhenkhat chuan an chhungkua hi he leia hremhmun ang hialin an siam a ni. Pa tam takte chu zaidam leh hmangaihna ngah tak an nih laiin ṭhenkhat chu ze nghet nei lo, rilru sukthlek danglam thut thut, nupui leh fate kutthlak hmang, mi khuahkhirh lutuk ching leh tharum thawh hreh lo an ni. Chuvang chuan "kan Pa vana mi" tih hian mi tam tak tan chuan thil ṭha lo a keng tel tlat a ni.

Mi tam tak chuan Pathian hi he leia an pa te ang mai a an ngaih avangin amah nen inzawmna tak tak an nei ngai lo. He leia an pa te kha mi vengva lo tak an nih chuan Pathian pawh vengva lo turah an dah ringawt. An pa te kha innghahnatlak an nih loh chuan Pathian pawh innghahnatlak loah an ngai ve leh bawk. An pa te awm dan kha an hriatthiam theih loh avangin Pathian pawh engtikah mah an hrethiam dawn lovin an ngai tlat.

Kan natna leh rilru nona te hi kan pa te aṭangin Pathianah ka bel ṭhin - hei vang hian Pathian nena inzawmna thuk tak neih kan harsat pawh hi a awm ve reng mai.

Pathian i lo rin dan dik tawk lo khan amah nen inzawmna nei thei lovin a siam che. Pa Pathian nihna hrechiang tak tak tur chuan Pathian nihna tur awm ang dik lo taka i lo suangtuah ṭhin te kha i paih bo a ngai.

Pathian nihna dik tak i hriat chianna chuan amah nen inzawmna thuk tak siam chein Pa angin a entir ang che.

Ngaihtuah zui atan.

Isuan ṭawngṭai dan min zirtir, "Kan Pa vana mi" tih i chhiar hian i rilruah eng ngaihtuahna leh hmelhmang nge lo lang?

Pathianah hia pa nihna eng zia nge i hmuh?

Pathianah hian "pa" nihna ṭha lo lam zawng i lo bel ṭhin engte nge vawiinah hian i paih bo ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...